امریکی ناظم الامور نیٹلی بیکر نے اعلان کیا ہے کہ امریکی ایکسپورٹ امپورٹ بینک (ایگزم بینک) بلوچستان میں ریکوڈک منصوبے میں 1.25 ارب ڈالر کی سرمایہ کاری کرے گا۔ اس منصوبے کے تحت دونوں ممالک میں ہزاروں افراد کو روزگار کے مواقع میسر آئیں گے۔
نیٹلی بیکر نے سماجی رابطے کی ویب سائٹ ایکس پر جاری ویڈیو بیان میں بتایا کہ اس سرمایہ کاری کے ذریعے کان کنی اور اہم معدنیات کے شعبے میں تعاون بڑھایا جائے گا۔ منصوبے کے تحت ریکوڈک کان کی تعمیر اور انتظام کے لیے دو ارب ڈالر مالیت کے اعلیٰ معیار کے امریکی معدنیات کے آلات اور خدمات فراہم کی جائیں گی۔
ان کے مطابق، اس منصوبے سے امریکا میں تقریباً 6 ہزار اور بلوچستان میں 7 ہزار 500 افراد کو روزگار کے مواقع حاصل ہوں گے۔ منصوبہ ماڈل پروجیکٹ کے طور پر کام کرے گا، جو امریکی ایکسپورٹرز کے ساتھ ساتھ پاکستان کی مقامی کمیونٹیز اور شراکت داروں کے لیے بھی فائدہ مند ثابت ہوگا، اور دونوں ممالک کی اقتصادی خوشحالی میں اضافہ کرے گا۔
ریکوڈک منصوبے میں عالمی سرمایہ کاری کی نئی لہر، آئی ایف سی کا 400 ملین ڈالر اضافی سرمایہ
نیٹلی بیکر نے مزید کہا کہ ٹرمپ انتظامیہ کے دور میں ایسے معاہدے امریکی سفارت کاری کا بنیادی حصہ بنے، اور امریکی کمپنیاں معدنیات کے شعبے میں پاکستان کے ساتھ مزید تعاون کے لیے پرعزم ہیں۔
تجزیہ کاروں کے مطابق، ریکوڈک منصوبے کی یہ سرمایہ کاری نہ صرف بلوچستان کی معیشت کو مستحکم کرے گی بلکہ معدنیات کے شعبے میں پاکستان اور امریکا کے درمیان قریبی تجارتی تعلقات بھی فروغ پائیں گے۔
