کراچی ایئرپورٹ پر ایک غیر معمولی واقعہ پیش آیا ہے، جہاں ٹارمک ایریا میں پارک شدہ ایک بین الاقوامی کارگو کمپنی کے طیارے سے لوڈر ٹرک ٹکرا گیا۔
ابتدائی اطلاعات کے مطابق طیارہ معمول کے مطابق کارگو لوڈنگ اور ان لوڈنگ کے لیے پارک کیا گیا تھا، جب اچانک ایک لوڈر ٹرک بے قابو ہو کر اس سے جا ٹکرایا۔
ذرائع کے مطابق حادثے کی ممکنہ وجہ گیلے ٹارمک پر ٹرک کے بریکس کا فیل ہونا بتائی جا رہی ہے۔ واقعے کے فوراً بعد ایئرپورٹ پر موجود عملے نے صورتحال کا جائزہ لیا اور متاثرہ طیارے کا معائنہ شروع کر دیا۔ فی الحال حادثے میں کسی قسم کے جانی نقصان کی اطلاع موصول نہیں ہوئی۔
پاکستان ایئرپورٹس اتھارٹی کے ایئر سائیڈ حکام نے واقعے کا نوٹس لیتے ہوئے فوری طور پر تحقیقات کا آغاز کر دیا ہے۔ حکام کا کہنا ہے کہ اس واقعے کی مکمل رپورٹ تیار کی جائے گی اور ذمہ داروں کا تعین کر کے ضروری کارروائی کی جائے گی۔
ایئرپورٹ پر فضائی آپریشن معمول کے مطابق جاری ہے، تاہم اس واقعے نے گراؤنڈ سیکیورٹی اور احتیاطی تدابیر پر سوالات کھڑے کر دیے ہیں۔ متعلقہ حکام کی جانب سے اس واقعے کی مکمل چھان بین کے بعد مزید تفصیلات جاری کیے جانے کا امکان ہے۔
