تحصیل گوجر خان میں راولپنڈی فلائنگ کلب سے تعلق رکھنے والے تربیتی طیارے کی فنی خرابی کے باعث ہنگامی لینڈنگ کرنا پڑی، جس کے نتیجے میں مرد پائلٹ اور ٹرینی خاتون پائلٹ زخمی ہو گئے۔
تفصیلات کے مطابق، تربیتی طیارے کے انجن میں دورانِ پرواز فنی خرابی پیدا ہوئی، جس کے باعث پائلٹ نے حاضر دماغی اور مہارت کا مظاہرہ کرتے ہوئے قریبی کھیتوں میں کریش لینڈنگ کی۔ کریش لینڈنگ کے دوران طیارہ مکمل طور پر تباہ ہونے سے بچ گیا، تاہم طیارے میں موجود دونوں افراد کو معمولی چوٹیں آئیں۔
حکام نے واقعے کی تصدیق کرتے ہوئے بتایا کہ کریش لینڈنگ راولپنڈی فلائنگ کلب کے تربیتی طیارے کے ساتھ پیش آئی، اور حادثے کے وقت طیارے میں صرف دو افراد، پائلٹ اور معاون (ٹرینی) پائلٹ سوار تھے۔ دونوں زخمیوں کو ابتدائی طبی امداد کے بعد ہسپتال منتقل کر دیا گیا، جہاں ان کی حالت خطرے سے باہر بتائی جا رہی ہے۔
پی آئی اے کا طیارہ خراب ہونے سے کراچی کی 6 پروازیں منسوخ
ائیرپورٹ اتھارٹی اور متعلقہ اداروں نے واقعے کی تحقیقات کا آغاز کر دیا ہے تاکہ انجن کی خرابی کی نوعیت اور دیگر تکنیکی پہلوؤں کا جائزہ لیا جا سکے۔ ابتدائی طور پر واقعے کو فنی خرابی کا نتیجہ قرار دیا گیا ہے۔
مقامی افراد نے بروقت لینڈنگ اور انسانی جانوں کے محفوظ رہنے پر پائلٹ کے فیصلے کو سراہا ہے۔ طیارے کے زمین پر گرنے کے دوران کوئی جانی نقصان یا زمین پر کسی فرد کو نقصان نہیں پہنچا، جسے خوش قسمتی قرار دیا جا رہا ہے۔
