پنجاب میں ٹریفک قوانین کی یکساں عملداری کے لیے جاری مہم کے دوران صرف چھ دنوں میں 2600 پولیس اہلکاروں کے خلاف ٹریفک چالان جاری کیے گئے ہیں۔ ڈی آئی جی ٹریفک پنجاب محمد وقاص نذیر کی ہدایت پر چلائی جانے والی ’’قانون سب کے لیے برابر‘‘ مہم کے تحت یہ کارروائیاں کی گئیں۔
ترجمان ٹریفک پولیس کے مطابق گزشتہ چھ روز میں ٹریفک خلاف ورزیوں پر 434 پولیس اہلکاروں کی سرکاری گاڑیاں بند کی گئیں، جب کہ سنگین خلاف ورزیوں کی بنیاد پر 10 اہلکاروں کے خلاف مقدمات بھی درج ہوئے۔ اس کے علاوہ 500 سے زائد دیگر سرکاری گاڑیوں پر بھاری جرمانے عائد کیے گئے۔
زیرو ٹالرنس پالیسی کے تحت 312 سرکاری گاڑیاں بند کی گئیں، جب کہ 5 سرکاری ڈرائیوروں کے خلاف ایف آئی آر کا اندراج بھی کیا گیا۔
ڈی آئی جی ٹریفک پنجاب کا کہنا تھا کہ صوبے میں گاڑی چلانے والا کوئی بھی شخص قانون سے بالاتر نہیں۔ انہوں نے کہا کہ وزیراعلیٰ پنجاب کی ہدایت کے مطابق ٹریفک قوانین پر مکمل عملدرآمد یقینی بنایا جا رہا ہے تاکہ سڑکوں پر نظم و ضبط برقرار رکھا جا سکے۔
