توشہ خانہ ٹو کیس میں سنائی گئی سزا کے خلاف بانی پاکستان تحریک انصاف عمران خان اور ان کی اہلیہ بشریٰ بی بی نے قانونی چارہ جوئی کا فیصلہ کرتے ہوئے اسلام آباد ہائی کورٹ میں اپیلیں دائر کر دی ہیں۔
دونوں جانب سے سزاؤں کے خلاف اپیلیں ان کے وکیل خالد یوسف چودھری کے ذریعے جمع کرائی گئی ہیں۔ عدالت نے بانی پی ٹی آئی کی اپیل پر ڈائری نمبر 24560 جبکہ بشریٰ بی بی کی اپیل پر ڈائری نمبر 24561 الاٹ کر دیا ہے۔
اپیلوں میں مؤقف اختیار کیا گیا ہے کہ ٹرائل کورٹ نے ایک ایسے گواہ کے بیان پر انحصار کیا جو پہلے ہی برطرف کیا جا چکا تھا، جبکہ وعدہ معاف گواہ کے بیان کو بنیاد بنانا قانونی طور پر درست نہیں تھا۔ درخواست گزاروں کا کہنا ہے کہ استغاثہ الزامات ثابت کرنے میں مکمل طور پر ناکام رہا۔
بانی پی ٹی آئی اور بشریٰ بی بی کی جانب سے دائر اپیلوں میں یہ بھی کہا گیا ہے کہ ایک ہی جرم میں بار بار سزا دینا قانون کے منافی ہے، جبکہ اسپیشل سینٹرل عدالت کو اس مقدمے کی سماعت کا اختیار ہی حاصل نہیں تھا۔
توشہ خانہ ٹو کیس کا فیصلہ: عمران خان اور بشریٰ بی بی کو طویل قید اور جرمانے کی سزا
اپیل میں مزید مؤقف اپنایا گیا کہ بلغاری سیٹ توشہ خانہ کے قواعد و ضوابط کے مطابق سابق حکمران جوڑے نے اپنے پاس رکھا تھا اور مقدمہ بغیر مکمل تفتیش کے قائم کیا گیا، جو انصاف کے تقاضوں کے خلاف ہے۔
درخواست گزاروں نے اسلام آباد ہائی کورٹ سے استدعا کی ہے کہ ٹرائل کورٹ کا فیصلہ کالعدم قرار دیا جائے اور اپیلوں کی سماعت جلد مقرر کی جائے تاکہ قانونی نکات پر تفصیلی غور کیا جا سکے۔
