بلوچستان کے ضلع موسیٰ خیل اور گرد و نواح میں 5.5 شدت کا زلزلہ، 2 مکانات مکمل تباہ، 3 افراد زخمی، شہری خوف و ہراس میں مبتلا۔
کوئٹہ: بلوچستان کے مختلف شہروں میں آج صبح زلزلے کے شدید جھٹکے محسوس کیے گئے، جن سے شہریوں میں شدید خوف و ہراس پھیل گیا۔ زلزلے کے بعد لوگ کلمہ طیبہ کا ورد کرتے ہوئے گھروں اور عمارتوں سے باہر نکل آئے۔
زلزلہ پیما مرکز کے مطابق، ریکٹر اسکیل پر زلزلے کی شدت 5.5 ریکارڈ کی گئی، جبکہ اس کی گہرائی 28 کلومیٹر تھی۔ زلزلے کا مرکز ضلع موسیٰ خیل سے 56 کلومیٹر شمال مشرق کی جانب بتایا گیا ہے۔ جھٹکوں کا دائرہ کار موسیٰ خیل سمیت قریبی علاقوں تک پھیل گیا۔
قدرتی آفات سے نمٹنے والے ادارے پی ڈی ایم اے (PDMA) کے مطابق، موسیٰ خیل میں زلزلے کے نتیجے میں دو مکانات مکمل طور پر منہدم ہو گئے ہیں، جبکہ تین مکانات کو جزوی نقصان پہنچا ہے۔ مکانات کے ملبے تلے دب کر تین افراد زخمی ہو گئے، جنہیں فوری طور پر طبی امداد کے لیے قریبی ہسپتال منتقل کیا گیا ہے۔
پی ڈی ایم اے نے متاثرہ علاقوں میں نقصانات کا تخمینہ لگانے اور مزید ممکنہ خطرات سے نمٹنے کے لیے ریسکیو ٹیموں کو الرٹ کر دیا ہے۔ ضلعی انتظامیہ کے مطابق، فوری ریلیف اقدامات کا آغاز کر دیا گیا ہے، جبکہ مقامی آبادی سے بھی احتیاط برتنے کی اپیل کی گئی ہے۔
واضح رہے کہ بلوچستان زلزلہ خیز خطے میں واقع ہے اور اس سے قبل بھی متعدد بار زلزلے بڑے جانی و مالی نقصان کا سبب بن چکے ہیں، اس لیے ماہرین وقتاً فوقتاً عوام کو حفاظتی تدابیر اختیار کرنے کی ہدایات دیتے رہتے ہیں۔
