قومی اسمبلی کے اسپیکر ایاز صادق نے اجلاس کے دوران انکشاف کیا ہے کہ کسی نے ان کی جعلی آواز بنا کر پیسے بٹورنے کی کوشش کی۔
اسپیکر کے مطابق جب اس شخص نے خود رابطہ کیا اور پوچھا کہ یہ رقم میں نے مانگی ہے یا نہیں، تو انہوں نے واضح کیا کہ انہوں نے کسی سے پیسے نہیں مانگے۔
اجلاس میں دیگر اراکین نے بھی اس معاملے پر بات کی۔ تحریکِ انصاف کے رکن اعجاز الحق نے بتایا کہ ان کے پاس 19 چالان موصول ہو چکے ہیں، اور کل بھی ایک چالان آیا تھا۔ اس موقع پر ایم این اے عالیہ کامران نے سوال کیا کہ یہ پیسے کس اکاؤنٹ میں جاتے ہیں اور کتنے اکاؤنٹس کی نشاندہی ہوئی ہے۔
مسلم لیگ ن کے رکن طلال چوہدری نے جواب دیتے ہوئے کہا کہ یہاں “رینٹ اے اکاؤنٹ” کا معاملہ ہے اور اس سلسلے میں تمام متعلقہ افراد کی تحقیقات کی جا رہی ہیں۔ اختیار بیگ نے مزید بتایا کہ اس معاملے میں اسٹیٹ بینک کو بھی شامل کر لیا گیا ہے تاکہ پیسے کے بہاؤ اور جعلی اکاؤنٹس کا مکمل سراغ لگایا جا سکے۔
27 ویں آئینی ترمیم کی منظوری کا معاملہ: وزیراعظم نے اسپیکر ایاز صادق کو اہم ٹاسک سونپ دیا
اسپیکر ایاز صادق نے کہا کہ یہ واقعہ جدید ٹیکنالوجی کے ذریعے بڑھتی ہوئی دھوکہ دہی کی سنگینی کی عکاسی کرتا ہے اور تمام اراکین کو اس بارے میں آگاہی رکھنی چاہیے۔ انہوں نے زور دیا کہ اس قسم کے معاملات پر سخت کارروائی ضروری ہے تاکہ عوام کو مالی نقصان سے محفوظ رکھا جا سکے۔
پارلیمانی مبصرین کے مطابق یہ واقعہ ملک میں سائبری کرائم اور جدید دھوکہ دہی کے خطرات کی طرف توجہ دلانے کے لیے اہم ہے، اور آئندہ ایسے کیسز کی روک تھام کے لیے سخت قوانین اور نگرانی کی ضرورت ہے۔
