7
اسلام آباد: سوئی ناردرن گیس کمپنی نے گیس کی قیمت میں 291 روپے فی ایم ایم بی ٹی یو اضافے کی درخواست دے دی ہے جس پر سی این جی، ٹیکسٹائل اور دیگر صنعتی صارفین نے شدید مخالفت کی ہے۔
چیئرمین اوگرا مسرور خان کی زیر صدارت گیس قیمتوں پر عوامی سماعت ہوئی۔ سماعت کے دوران چیئرمین اوگرا نے کہا کہ سوئی ناردرن اپنے اخراجات کم کرے کیونکہ بار بار بوجھ صارفین پر منتقل کیا جا رہا ہے۔
غیاث پراچہ نے موقف اختیار کیا کہ کمپنی نے پہلے بھی قیمت میں اضافہ مانگا تھا اور اب مزید 20 روپے بڑھا دیے ہیں۔
چیئرمین اوگرا نے کہا کہ صارفین کو ریلیف فراہم کیا جائے گا، ہماری کوشش ہے کہ صارفین پر کم سے کم بوجھ ڈالا جائے اور کمپنیوں کے خسارے میں بھی کمی لائی جائے۔
اوگرا حکام کے مطابق گیس کی قیمتوں میں اضافہ ایک مشکل فیصلہ ہے، تاہم عوامی سماعت مکمل کر لی گئی ہے اور اسٹیک ہولڈرز کی مشاورت کے بعد ہی حتمی فیصلہ کیا جائے گا۔
