موٹرسائیکل کی نئی نمبر پلیٹ نہ ہونے پر چالان کا اقدام، سماجی کارکن نے سندھ ہائیکورٹ سے رجوع کرلیا، عملدرآمد روکنے کی استدعا
کراچی: موٹرسائیکل پر نئی نمبر پلیٹ نہ ہونے کی بنیاد پر ٹریفک پولیس کی جانب سے چالان کاٹنے کے اقدام کو سندھ ہائیکورٹ میں چیلنج کر دیا گیا ہے۔ یہ آئینی درخواست سماجی کارکن فیضان حسین نے دائر کی ہے، جس میں مؤقف اختیار کیا گیا ہے کہ ڈی آئی جی ٹریفک نے تمام اہلکاروں کو نئی نمبر پلیٹس کے معاملے پر سختی سے عمل درآمد کا حکم دیا، جس کے بعد ٹریفک پولیس نے آگاہی مہم کے بجائے براہ راست بھاری چالان کا سلسلہ شروع کر دیا۔
درخواست گزار کے مطابق شہری پہلے ہی مہنگائی سے پریشان ہیں اور اب نئی نمبر پلیٹ نہ لگانے پر ہزاروں روپے کے چالان ادا کرنا شہریوں کے لیے مزید مشکلات پیدا کر رہا ہے۔ فیضان حسین کا کہنا ہے کہ پولیس کا یہ اقدام عوامی سہولت کے بجائے سزا دینے کے مترادف ہے، جس پر عدالت کو مداخلت کرنی چاہیے۔
درخواست میں عدالت سے استدعا کی گئی ہے کہ پولیس کو نئی نمبر پلیٹ نہ ہونے کی صورت میں فوری طور پر چالان سے روکا جائے اور معاملے پر کوئی حتمی فیصلہ ہونے تک شہریوں کو ریلیف دیا جائے۔
یاد رہے کہ** درخواست گزار نے موٹرسائیکل کی موجودہ نمبر پلیٹس کو تبدیل کرنے کے حکومتی فیصلے کو بھی الگ درخواست کے ذریعے عدالت میں چیلنج کر رکھا ہے، اور اس پر بھی سندھ ہائیکورٹ میں سماعت جاری ہے۔
