راولپنڈی ، گورنر سندھ کامران ٹیسوری نے شہید سکواڈرن لیڈر عثمان یوسف کی رہائش گاہ کا دورہ کیا اور اہل خانہ کے ساتھ اظہار تعزیت کیا۔
جڑواں شہروں میں شہید کی رہائش گاہ پر میڈیا سے بات کرتے ہوئے کامران ٹیسوری نے کہا کہ پاکستان نے بھارتی جارحیت کا بھرپور اور منہ توڑ جواب دیا ہے، ہمیں اپنے شہدا پر فخر ہے،بھارت کا مقابلہ صرف فوج نے نہیں بلکہ 25 کروڑ عوام نے بھی مل کر کیا، پوری قوم اپنے شہدا کی مقروض ہے۔
انہوں نے بتایا کہ شہید عثمان یوسف کا تمام خاندان فوج سے تعلق رکھتا ہے اور وطن کے دفاع کے لیے ہم سب ایک ہیں۔ جنگ کے دوران بھارتی میڈیا نے جھوٹ پھیلایا، جبکہ پاکستانی میڈیا نے بھارتی جھوٹ کو بے نقاب کیا۔
گورنر سندھ نے کہا کہ بھارت نے پہلگام واقعے کا کوئی ٹھوس ثبوت ابھی تک نہیں پیش کیا، جبکہ بھارتی میڈیا نے جھوٹے دعوے کیے۔ قوم اپنی مسلح افواج کے شانہ بشانہ کھڑی ہے، اور پاک فضائیہ نے بھارت کے جدید ٹیکنالوجی کے غرور کو خاک میں ملا دیا۔
کامران ٹیسوری نے مزید کہا کہ پاک بحریہ کی بھرپور تیاری نے دشمن کو سمندری محاذ پر لڑنے کی جرات نہ دی۔ دوست ممالک نے پاک بھارت کشیدگی کم کرنے میں اہم کردار ادا کیا ہے۔ انہوں نے کہا کہ ملک معاشی ترقی کی راہ پر گامزن ہے۔
یاد رہے کہ پاک فوج اور قوم نے ہر بھارتی جارحیت کا بھرپور جواب دیا ہے اور شہداء کی قربانیوں کو ہمیشہ یاد رکھا جاتا ہے۔
