لاہور، وزیراعظم شہباز شریف نے بانی پاکستان تحریک انصاف (پی ٹی آئی) کے خلاف 10 ارب روپے ہرجانے کے مقدمے میں ویڈیو لنک کے ذریعے لاہور کی عدالت میں پیشی دی۔
سماعت کے آغاز پر وزیراعظم شہباز شریف نے عدالت سے مخاطب ہوتے ہوئے کہا، ’’جج صاحب، آپ سمیت کمرۂ عدالت میں موجود تمام افراد کو فتح مبارک ہو۔‘‘ اس پر بانی پی ٹی آئی کے وکیل نے جواب دیا، ’’یہ بہت خوشی کی بات ہے، ساری قوم کی فتح ہے۔‘‘
دورانِ سماعت، بانی پی ٹی آئی کے وکیل نے جرح کرتے ہوئے سوال کیا کہ کیا یہ درست ہے کہ آپ نے دعوے میں اخبارات کو فریق نہیں بنایا اور نہ ہی لیگل نوٹس جاری کیا؟ کیا اس کی وجہ یہ ہے کہ بانی پی ٹی آئی نے خود اخبارات کو بیان جاری نہیں کیا تھا؟ اس پر شہباز شریف نے جواب دیا کہ 28 اپریل 2017 کو بانی پی ٹی آئی نے پریڈ گراؤنڈ میں جلسہ کیا، جس کی خبر اگلے روز اخبارات میں شائع ہوئی۔
وکیل نے مزید پوچھا کہ پاناما کیس کا فیصلہ کیا تھا؟ اس پر شہباز شریف نے کہا کہ پاناما کیس میرے خلاف نہیں تھا، اس لیے مجھے فیصلے کی تفصیلات معلوم نہیں۔ جب وکیل نے پوچھا کہ پاناما کیس میں فریق کون تھے؟ تو وزیراعظم نے کہا، ’’میں فریق نہیں تھا، مگر یہ سب ریکارڈ کا حصہ ہے۔‘‘
عدالت نے سماعت 2 جون تک ملتوی کرتے ہوئے آئندہ سماعت پر جرح مکمل کرنے کی ہدایت کی ہے۔
یاد رہے کہ یہ ہرجانے کا مقدمہ اس وقت دائر کیا گیا تھا جب بانی پی ٹی آئی نے الزام لگایا تھا کہ شہباز شریف نے انہیں پاناما کیس میں خاموش رہنے کے لیے 10 ارب روپے کی پیشکش کی تھی۔ ان الزامات کے ردعمل میں شہباز شریف نے بانی پی ٹی آئی کے خلاف ہتکِ عزت کا مقدمہ لاہور کی عدالت میں دائر کیا تھا، جس کی سماعت کئی سال سے جاری ہے۔
