وزیر اطلاعات سندھ شرجیل انعام میمن نے کہا ہے کہ وزیراعلیٰ خیبرپختونخوا سہیل آفریدی کو سندھ میں ہر ممکن سہولت فراہم کی جائے گی، تاہم شرط صرف یہ ہے کہ وہ قانون کو اپنے ہاتھ میں نہ لیں اور آئین و قانون کے دائرے میں رہتے ہوئے اپنی سیاسی سرگرمیاں انجام دیں۔ ان کا کہنا تھا کہ جمہوریت میں اختلاف رائے اور سیاسی سرگرمیاں سب کا حق ہیں، لیکن قانون شکنی کسی صورت برداشت نہیں کی جائے گی۔
شرجیل میمن نے ایک بیان میں واضح کیا کہ سندھ حکومت سیاسی رواداری پر یقین رکھتی ہے اور کسی بھی سیاسی جماعت یا رہنما کو اظہارِ رائے سے روکنے کی پالیسی پر عمل نہیں کر رہی۔ انہوں نے کہا کہ سہیل آفریدی ہوں یا کوئی اور سیاسی رہنما، اگر وہ پرامن طریقے سے سیاست کرنا چاہتے ہیں تو سندھ حکومت ان کے لیے آسانیاں پیدا کرے گی۔
دوسری جانب وزیر بلدیات سندھ ناصر حسین شاہ نے بھی اس مؤقف کی تائید کرتے ہوئے کہا کہ وزیراعلیٰ خیبرپختونخوا سہیل آفریدی کو سندھ میں سیاسی سرگرمیوں کی مکمل اجازت ہے۔ انہوں نے بتایا کہ کراچی کے باغ جناح میں جلسے کی اجازت دی جا رہی ہے اور انتظامیہ کو ہدایات جاری کر دی گئی ہیں کہ جلسے کے انعقاد میں قانونی تقاضوں کو مدنظر رکھتے ہوئے تعاون کیا جائے۔
ناصر شاہ کا کہنا تھا کہ سندھ ہمیشہ سے سیاسی جماعتوں کے لیے ایک کھلا صوبہ رہا ہے، جہاں ہر جماعت کو جلسے، جلوس اور اجتماعات کے انعقاد کی اجازت دی جاتی ہے، بشرطیکہ امن و امان کی صورتحال متاثر نہ ہو۔ انہوں نے کہا کہ صوبائی حکومت کا مقصد کسی کو روکنا نہیں بلکہ عوام کے جان و مال کا تحفظ یقینی بنانا ہے۔
عظمیٰ بخاری جس طرح اقتدار میں آئیں، بلاول عوام کے ووٹ سے آئیں گے: شرجیل میمن
ادھر وزیر اطلاعات سندھ شرجیل میمن نے ایک بار پھر اس بات پر زور دیا کہ سہیل آفریدی کو ہر سہولت دی جائے گی، لیکن وہ قانون کو ہاتھ میں لینے سے گریز کریں۔ ان کے مطابق، کسی بھی غیر قانونی اقدام یا اشتعال انگیز بیان کی اجازت نہیں دی جا سکتی، کیونکہ اس سے نہ صرف امن و امان متاثر ہوتا ہے بلکہ جمہوری عمل کو بھی نقصان پہنچتا ہے۔
علاوہ ازیں چیئرمین پاکستان تحریک انصاف بیرسٹر گوہر علی خان نے سندھ حکومت کی جانب سے خیرمقدم اور جلسے کی اجازت دینے پر شکریہ ادا کیا ہے۔ انہوں نے کہا کہ پی ٹی آئی جمہوری اور پرامن سیاست پر یقین رکھتی ہے اور سندھ حکومت کے تعاون کو مثبت قدم قرار دیا۔
سیاسی مبصرین کے مطابق سندھ حکومت کے حالیہ بیانات اس بات کی عکاسی کرتے ہیں کہ صوبہ سیاسی کشیدگی کے بجائے مکالمے اور رواداری کو فروغ دینا چاہتا ہے، جبکہ آنے والے دنوں میں سہیل آفریدی کے جلسے کو ملکی سیاست میں ایک اہم پیش رفت کے طور پر دیکھا جا رہا ہے۔
