سندھ کے سینئر وزیر شرجیل انعام میمن کی زیر صدارت کراچی میں منعقدہ اجلاس میں ایک اہم پیش رفت سامنے آئی ہے۔ انہوں نے اعلان کیا ہے کہ دسمبر 2025 سے پاکستان میں پہلی بار حکومت سندھ ای وی (الیکٹرک وہیکل) ٹیکسی سروس کا آغاز کرے گی۔
شرجیل میمن نے اجلاس سے خطاب کرتے ہوئے بتایا کہ یہ منصوبہ چیئرمین بلاول بھٹو کی خصوصی دلچسپی کے باعث ممکن ہو رہا ہے، اور ابتدائی مرحلے میں خواتین کے لیے مخصوص ٹیکسیاں متعارف کرائی جائیں گی، تاکہ انہیں محفوظ، باوقار اور سستی سفری سہولت فراہم کی جا سکے۔
انہوں نے مزید کہا کہ صوبے میں ٹرانسپورٹ کے مسائل کو کم کرنے کے لیے ڈبل ڈیکر بسیں اور مزید ای وی بسیں بھی جلد شامل کی جائیں گی۔ ساتھ ہی ساتھ ای وی گاڑیوں کے لیے انفرااسٹرکچر اور چارجنگ اسٹیشنز کی تنصیب پر کام تیزی سے جاری ہے۔
شرجیل میمن نے کہا کہ حکومت سندھ خواتین کو بااختیار بنانے اور عوام کو جدید ٹرانسپورٹ سہولیات دینے کے لیے پرعزم ہے۔ انہوں نے کراچی میں ٹرانسپورٹ کے شعبے میں سرمایہ کاری کے بے پناہ مواقع پر بھی زور دیا۔
