اسلام آباد میں تعلیمی ادارے اور دفاتر کھلے رہیں گے، انتظامیہ کا اعلان

ضلعی انتظامیہ نے واضح کیا ہے کہ آج (14 اکتوبر) اسلام آباد کے تمام تعلیمی ادارے، دفاتر اور سرکاری دفاتر معمول کے مطابق کھلے رہیں گے، اور کسی بھی قسم کی تعطیل یا بندش کی افواہیں بے بنیاد ہیں۔

انتظامیہ کی جانب سے جاری بیان میں کہا گیا ہے کہ شہری افواہوں پر کان نہ دھریں، تمام اسکول، کالج، یونیورسٹیاں اور سرکاری دفاتر اپنے مقررہ اوقات کار کے مطابق کام کریں گے۔

دوسری جانب وزیر تعلیم پنجاب رانا سکندر حیات نے بھی تصدیق کی ہے کہ پنجاب بھر میں تمام اسکولز معمول کے مطابق کھلے ہیں اور تعلیمی سرگرمیاں جاری رہیں گی۔

انتظامیہ نے شہریوں سے اپیل کی ہے کہ وہ صرف سرکاری ذرائع سے جاری کردہ خبروں پر یقین کریں اور غیر مصدقہ اطلاعات سے گریز کریں۔