پنجاب کے اسکولوں میں کینسر سے بچاؤ کی ویکسینیشن مہم کا آغاز کر دیا گیا ہے۔ اسکول ایجوکیشن ڈیپارٹمنٹ نے صوبے بھر کے سی ای اوز ایجوکیشن کو ہدایات جاری کر دی ہیں کہ والدین کی تحریری رضامندی کے بعد ہی بچیوں کو ویکسین دی جائے۔
محکمہ اسکول ایجوکیشن کے مطابق، یہ ویکسین نو سے چودہ سال کی عمر کی بچیوں کو لگائی جائے گی۔ اس مہم کے دوران تقریباً آٹھ لاکھ بچیوں کو کینسر سے بچاؤ کی یہ ویکسین دی جائے گی، جس کا مقصد نوعمر بچیوں کو مستقبل میں لاحق ممکنہ خطرناک بیماریوں سے بچانا ہے۔
محکمہ صحت کا تربیت یافتہ عملہ اسکولوں کا دورہ کرے گا اور وہی بچیوں کو ویکسین فراہم کرے گا۔ یہ مہم 15 ستمبر سے 27 ستمبر 2025 تک جاری رہے گی۔
ذرائع کے مطابق، یہ ویکسین ہیومن پیپیلوما وائرس (HPV) کے خلاف دی جا رہی ہے، جو سروائیکل کینسر سمیت دیگر خطرناک بیماریوں کا باعث بن سکتا ہے۔ دنیا بھر میں اس ویکسین کو بچیوں میں جلدی عمر میں لگانے کی سفارش کی جاتی ہے تاکہ مستقبل میں ان کو بیماری سے محفوظ رکھا جا سکے۔
محکمہ تعلیم اور صحت نے والدین سے اپیل کی ہے کہ وہ تحریری رضامندی جلد از جلد اسکولوں کو فراہم کریں تاکہ ان کی بچیاں اس حفاظتی مہم سے مستفید ہو سکیں۔
