سرگودھا میں لڑکی کو زہر دے کر قتل کردیا گیا

سرگودھا کے علاقے چھوٹا ساہیوال میں ایک لڑکی کو زہر دے کر قتل کر دیا گیا۔ پولیس کے مطابق واقعے کا مقدمہ لڑکی کے سگے بھائی کی مدعیت میں درج کیا گیا ہے۔

مقدمہ کے متن کے مطابق دو سوتیلے بھائی بہانے سے لڑکی اور اس کے بھائی کو میلے دیکھنے کے لیے چھوٹا ساہیوال لے گئے، جہاں سوتیلے بھائیوں نے لڑکی کو اپنے دوست سے شادی کرنے کا کہا۔ شادی سے انکار پر لڑکی کو ناشتے میں زہر دے دیا گیا۔

فوری طور پر اسپتال منتقل کیا گیا لیکن وہ جان کی بازی ہار گئی۔ پولیس نے بتایا کہ اس دوران ایک سوتیلے بھائی نے خود بھی زہر کھا لیا، جس کے بعد اسے بھی اسپتال منتقل کیا گیا، اور وہ زیر علاج ہے۔

پولیس نے واقعے کی تفتیش شروع کر دی ہے اور تمام پہلوؤں کا جائزہ لے رہی ہے تاکہ قاتلوں اور اس واقعے کے محرکات کو سامنے لایا جا سکے۔ مقامی افراد کا کہنا ہے کہ یہ واقعہ علاقے میں شدید صدمہ اور تشویش کا باعث بنا ہے۔