پنجاب میں ہر شہری کا موبائل فون اب سیف سٹی کا کیمرہ بن گیا ہے۔ وزیراعلیٰ پنجاب کے محفوظ پنجاب ویژن کے تحت پنجاب سیف سٹیز اتھارٹی نے شہریوں کی حفاظت کے لیے ایک اہم اقدام اٹھایا ہے۔
اس انقلابی منصوبے کا مقصد سنگین واقعات کے ویڈیو شواہد فوری طور پر سیف سٹی کنٹرول روم تک پہنچانا ہے، تاکہ ریسپانس ٹائم کم ہو اور مدد فوری طور پر فراہم کی جا سکے۔ اس سلسلے میں سیف سٹی کی پبلک سیفٹی ایپ میں جدید فیچر "کنیکٹ ٹو پی ایس سی اے” شامل کیا گیا ہے، جس کے ذریعے شہری اپنے موبائل کیمرے کو براہِ راست سیف سٹی کنٹرول روم سے منسلک کر سکیں گے۔
اس فیچر کے تحت شہری کسی بھی ہنگامی موقع کی لائیو ویڈیو فوری طور پر سیف سٹی کو فراہم کر سکیں گے، جس سے اصل صورتحال کا فوری اندازہ لگایا جا سکے گا۔
ترجمان سیف سٹی کے مطابق، ایمرجنسی ہیلپ لائن 15 پر کال کرنے پر آفیسر شہری کو لائیو فیڈ کا خصوصی لنک بھیجے گا۔ لنک اوپن کرنے پر شہری کا موبائل کیمرہ براہِ راست سیف سٹی کنٹرول روم سے منسلک ہو جائے گا، جس سے موقع پر موجود صورتحال کو حقیقی وقت میں دیکھا جا سکے گا اور فوری امدادی کارروائی ممکن ہوگی۔
ترجمان نے واضح کیا کہ یہ سروس صرف ایمرجنسی کی صورت میں استعمال کے لیے ہے اور شہریوں سے درخواست ہے کہ موبائل کی لوکیشن آن رکھیں تاکہ درست مقام کی نشاندہی ہو سکے۔ انہوں نے مزید کہا کہ شہری غیر ضروری ویڈیوز شیئر نہ کریں، کیونکہ اس فیچر کا مقصد صرف ہنگامی مدد اور بروقت کارروائی کو یقینی بنانا ہے۔
