راولپنڈی: ٹریفک پولیس نے قوانین کی خلاف ورزی پر کریک ڈاؤن مہم شروع کرتے ہوئے سرکاری گاڑیوں سمیت ٹریفک اور ضلعی پولیس افسران کو بھی قانون کی زد میں لے لیا، اور ایک دن کے دوران مجموعی طور پر 21 سرکاری وہیکلز کے چالان ٹکٹ جاری کیے گئے۔
ایکسپریس نیوز کے مطابق، وزیر اعلیٰ پنجاب مریم نواز کے ویژن کے تحت سڑکوں کو ٹریفک کے لیے محفوظ بنانے اور قوانین کی پابندی کو یقینی بنانے کے لیے یہ مہم چلائی گئی۔
چیف ٹریفک افسر فرحان اسلم کے احکامات پر کریک ڈاؤن کے دوران ڈی ایس پی ٹریفک کینٹ کی سرکاری گاڑی کالے شیشوں کے ساتھ پکڑی گئی، جس کا 500 روپے کا چالان ٹکٹ جاری کیا گیا اور کالے شیشے اتار دیے گئے۔ ڈی ایس پی کے سرکاری ڈرائیور کو بھی شوکاز نوٹس جاری کیا گیا۔
چیف ٹریفک افسر فرحان اسلم نے کہا کہ قانون سب کے لیے برابر ہے، سرکاری افسران اور عملہ بھی قانون کی پابندی کرے۔ انہوں نے واضح کیا کہ سرکاری ملازم جو بغیر ہیلمٹ موٹر سائیکل یا بغیر نمبر پلیٹ گاڑی چلائے گا، اس کا چالان ہوگا اور متعلقہ محکمے کو بھی محکمانہ کارروائی کے لیے مطلع کیا جائے گا۔
اس دن کے دوران 21 سرکاری گاڑیوں کو ون وے خلاف ورزی، کالے شیشوں کے استعمال، بغیر ہیلمٹ یا نمبر پلیٹ کی خلاف ورزی پر چالان کیا گیا۔
