راولپنڈی کے ہولی فیملی اسپتال میں پیش آنے والے افسوسناک واقعے میں سکیورٹی گارڈ کے مبینہ تشدد سے ایک نوجوان جاں بحق ہو گیا۔ واقعے نے اسپتال انتظامیہ اور سکیورٹی انتظامات پر سنگین سوالات کھڑے کر دیے ہیں، جبکہ پولیس نے فوری کارروائی کرتے ہوئے مقدمہ درج کر کے ملزم کو گرفتار کر لیا ہے۔
پولیس کے مطابق جاں بحق ہونے والے نوجوان کی شناخت محمد وقار کے نام سے ہوئی ہے، جو اپنی والدہ کو میڈیکل چیک اپ کے لیے ہولی فیملی اسپتال لایا تھا۔ ایف آئی آر میں بتایا گیا ہے کہ چیک اپ کے بعد واپسی کے دوران اسپتال کی پارکنگ میں وقار اور سکیورٹی گارڈ کے درمیان کسی بات پر تنازع پیدا ہو گیا، جو دیکھتے ہی دیکھتے تشدد میں بدل گیا۔
ایف آئی آر کے مطابق مبینہ طور پر سکیورٹی گارڈ نے محمد وقار کو مُکے اور لاتیں ماریں، جس کے باعث وہ شدید متاثر ہوا۔ پولیس کا کہنا ہے کہ تشدد کے بعد نوجوان کی طبیعت اچانک بگڑ گئی اور اسے دل کا دورہ پڑا، جس کے نتیجے میں وہ موقع پر ہی دم توڑ گیا۔
پولیس حکام نے بتایا کہ یہ واقعہ دو روز قبل ہولی فیملی اسپتال کی پارکنگ میں پیش آیا تھا۔ واقعے کی اطلاع ملنے پر تھانہ نیو ٹاؤن پولیس نے کارروائی کرتے ہوئے مقدمہ درج کیا اور نامزد ملزم سکیورٹی گارڈ کو گرفتار کر لیا۔ پولیس کا کہنا ہے کہ واقعے کی مکمل تفتیش جاری ہے اور پوسٹ مارٹم رپورٹ سمیت دیگر شواہد کی روشنی میں مزید قانونی کارروائی کی جائے گی۔
واقعے کے بعد لواحقین نے شدید غم و غصے کا اظہار کرتے ہوئے مطالبہ کیا ہے کہ ملزم کو قرار واقعی سزا دی جائے۔ شہری حلقوں کا کہنا ہے کہ اسپتال جیسے حساس مقامات پر سکیورٹی اہلکاروں کا غیر ذمہ دارانہ رویہ ناقابلِ قبول ہے اور اس حوالے سے سخت اقدامات کی ضرورت ہے تاکہ آئندہ ایسے افسوسناک واقعات سے بچا جا سکے۔
