وزیراعظم شہباز شریف کے مشیر برائے سیاسی امور اور مسلم لیگ (ن) کے سینئر رہنما سینیٹر رانا ثناء اللّٰہ نے کہا ہے کہ جو لوگ اپنے سیاسی مخالفین کے خلاف جھوٹے مقدمات بنواتے رہے اور معاشرے میں نفرت کو فروغ دیتے رہے، آج وہ خود مکافاتِ عمل کا سامنا کر رہے ہیں۔ ان کا کہنا تھا کہ سیاست کو انتقام کا ذریعہ بنانے والوں کو تاریخ کبھی معاف نہیں کرتی۔
فیصل آباد میں ایک تقریب سے خطاب کرتے ہوئے رانا ثناء اللّٰہ نے کہا کہ ماضی میں ایک مخصوص سیاسی جماعت کے دورِ حکومت میں ان کے خلاف من گھڑت اور بے بنیاد مقدمات قائم کیے گئے۔ انہوں نے کہا کہ آج وہی عناصر خود قانون اور حالات کی گرفت میں ہیں، جو اس بات کا ثبوت ہے کہ ظلم اور ناانصافی زیادہ دیر تک قائم نہیں رہتی۔
انہوں نے کہا کہ ایسے افراد کو موجودہ حالات پر شکوہ کرنے کے بجائے اپنے رویے پر نظرثانی کرنی چاہیے۔ رانا ثناء اللّٰہ کے مطابق مظلوم بننے کا ڈرامہ رچانے کے بجائے بہتر راستہ یہ ہے کہ وہ اپنے اقدامات کو تسلیم کریں اور قوم سے معافی مانگیں۔ ان کا کہنا تھا کہ سیاست میں اخلاقیات اور برداشت کا فقدان ہی ملک کے بڑے مسائل کی جڑ ہے۔
وزیراعظم کے مشیر نے کہا کہ مسلم لیگ (ن) نے ہمیشہ یہ مؤقف اپنایا ہے کہ سیاسی اختلافات کو بات چیت اور مذاکرات کے ذریعے حل کیا جانا چاہیے، مگر مخالفین نے تصادم، جھوٹے مقدمات اور نفرت کی سیاست کو ترجیح دی۔ انہوں نے الزام عائد کیا کہ انہی پالیسیوں کی وجہ سے ملک میں سیاسی انتشار اور اداروں کے درمیان کشیدگی پیدا ہوئی۔
مسلسل احتجاج جاری رہا تو عمران خان کی دوسری جیل منتقلی پر غور ہوسکتا ہے، رانا ثناءاللّٰہ
رانا ثناء اللّٰہ نے پی ٹی آئی کی جانب سے ایک بار پھر اسٹریٹ موومنٹ کی بات کرنے پر بھی تنقید کی۔ انہوں نے کہا کہ ماضی کی طرح اس بار بھی ایسی کسی تحریک کو ناکامی کا سامنا کرنا پڑے گا، اور بالآخر انہیں دوبارہ مذاکرات کی میز پر آنا پڑے گا۔ ان کے مطابق انتشار کے بجائے سیاسی استحکام ہی ملک کو آگے لے جا سکتا ہے۔
انہوں نے مزید کہا کہ پاکستان کو اس وقت سنجیدہ اور بالغ نظر سیاست کی ضرورت ہے، نہ کہ الزام تراشی اور محاذ آرائی کی، کیونکہ قوم اب نفرت نہیں بلکہ حل چاہتی ہے۔
