محکمہ موسمیات نے پیشگوئی کی ہے کہ ملک کے بعض علاقوں میں آئندہ چوبیس گھنٹوں کے دوران تیز ہواؤں، گرج چمک اور کہیں کہیں موسلا دھار بارش کا امکان ہے، جبکہ بیشتر علاقوں میں موسم خشک اور گرم رہے گا۔
محکمہ موسمیات کے مطابق گلگت بلتستان، کشمیر اور ان سے ملحقہ پہاڑی علاقوں میں چند مقامات پر تیز ہواؤں اور گرج چمک کے ساتھ مزید بارش ہو سکتی ہے۔ ان علاقوں میں بعض بلند پہاڑی مقامات پر ہلکی برفباری کا بھی امکان ظاہر کیا گیا ہے۔
اسلام آباد اور گردونواح میں موسم خشک رہنے کے باوجود مطلع جزوی طور پر ابر آلود رہے گا، جبکہ راولپنڈی، مری، گلیات، چکوال، جہلم، گجرات، لاہور، سیالکوٹ، نارووال اور وزیرآباد میں کہیں کہیں بارش متوقع ہے۔
بلوچستان کے ساحلی علاقوں میں بھی جزوی ابر آلود موسم کی پیشگوئی کی گئی ہے، تاہم اندرونِ بلوچستان اور سندھ کے بیشتر اضلاع میں موسم گرم اور خشک رہنے کا امکان ہے۔
ملک کے مختلف حصوں میں آندھی اور گرج چمک کے ساتھ بارش کی پیشگوئی
خیبرپختونخوا کے بعض علاقوں جیسے دیر، چترال، سوات، کوہستان، شانگلہ اور بٹگرام میں بھی گرج چمک کے ساتھ بارش متوقع ہے، جبکہ گلگت بلتستان اور آزاد کشمیر میں شدید موسمی سرگرمیوں کا امکان ہے۔
محکمہ موسمیات کے مطابق گزشتہ 24 گھنٹوں کے دوران پنجاب، کشمیر، خیبرپختونخوا اور گلگت بلتستان میں تیز ہواؤں کے ساتھ بارش ہوئی، جبکہ چند مقامات پر موسلا دھار بارش بھی ریکارڈ کی گئی۔ باقی ملک میں موسم گرم اور خشک رہا۔
دوسری جانب پی ڈی ایم اے پنجاب نے بارشوں کے پیش نظر ممکنہ سیلابی صورتحال سے متعلق الرٹ جاری کر دیا ہے۔ ادارے کے مطابق دریائے جہلم کے منگلا اپ اسٹریم پر پانی کی سطح میں اضافہ متوقع ہے، جہاں آئندہ 24 گھنٹوں میں درمیانے درجے کے سیلاب کی صورتحال پیدا ہو سکتی ہے۔
