کراچی میں ربیع الاول کا چاند دیکھنے کیلئے مرکزی رویت ہلال کمیٹی کا اجلاس آج ہوگا، سعودی عرب اور عمان میں چاند نظر آچکا، 12 ربیع الاول 4 ستمبر کو منائی جائے گی۔
کراچی،ماہِ ربیع الاول 1447 ہجری کا چاند دیکھنے کے لیے مرکزی رویت ہلال کمیٹی کا اجلاس آج کراچی میں منعقد ہوگا۔ اجلاس کی صدارت چیئرمین مرکزی رویت ہلال کمیٹی مولانا عبدالخبیر آزاد کریں گے۔
اجلاس میں رویت ہلال کمیٹی کراچی کے اراکین، وزارت مذہبی امور، محکمہ موسمیات، سپارکو اور وزارت سائنس و ٹیکنالوجی کے نمائندے شریک ہوں گے۔
اس کے علاوہ اسلام آباد، لاہور، کوئٹہ اور پشاور سمیت ملک کے دیگر شہروں میں زونل کمیٹیوں کے اجلاس بھی ہوں گے، تاہم چاند کی رویت کا حتمی اعلان چیئرمین مرکزی رویت ہلال کمیٹی کریں گے۔
دوسری جانب سعودی عرب میں ربیع الاول کا چاند نظر آگیا ہے۔ حرمین کے سرکاری ایکس (ٹوئٹر) اکاؤنٹ کے مطابق چاند دیکھنے کے بعد مکہ مکرمہ میں کلاک ٹاور کو روشن کر کے ماہ ربیع الاول کے آغاز کا اعلان کیا گیا۔
عرب میڈیا کے مطابق سعودی سپریم کورٹ نے تصدیق کی ہے کہ 12 ربیع الاول 4 ستمبر 2025 کو ہوگی۔
اسی طرح عمان کے حکام نے بھی اعلان کیا ہے کہ ملک میں ربیع الاول کا چاند 23 اگست کو نظر آیا تھا، جس کے مطابق 24 اگست (اتوار) یکم ربیع الاول ہے۔
اس سے قبل کویت کی حکومت نے اعلان کیا ہے کہ یوم ولادت رسول ﷺ کے موقع پر 4 ستمبر بروز جمعرات کو وزارتوں اور سرکاری اداروں میں عام تعطیل ہوگی۔
