پنجاب میں پولیس اصلاحات کے حوالے سے ایک تاریخی فیصلہ کیا گیا ہے، جس کا مقصد عوام کے لیے پولیس کے نظام کو شفاف، مؤثر اور شہری دوست بنانا ہے۔ وزیراعلیٰ پنجاب مریم نواز کی زیر صدارت ہونے والے اجلاس میں اس بات پر اتفاق کیا گیا کہ ہر پولیس اسٹیشن میں اصلاحات کے فوری نفاذ کے لیے تین ماہ کی سخت ٹائم لائن مقرر کی جائے گی۔
باڈی کیمز اور پینک بٹن کی تنصیب
اجلاس میں فیصلہ کیا گیا کہ ہر پولیس اسٹیشن کے دس اہلکاروں پر باڈی کیم نصب کی جائیں گی، تاکہ ہر انویسٹی گیشن اور تھانے کے اندر ہونے والی کارروائی کی ویڈیو اور آڈیو ریکارڈنگ دستیاب ہو۔ پنجاب بھر میں تقریباً 14 ہزار باڈی کیم اور 700 پینک بٹن (Panic Button) نصب کیے جائیں گے، تاکہ شہری کسی بھی ہنگامی صورتحال میں فوری مدد حاصل کر سکیں۔
شہریوں کے ساتھ رویے میں تبدیلی
وزیراعلیٰ نے پولیس اہلکاروں کے رویے کو بہتر بنانے پر زور دیتے ہوئے کہا کہ ہر اہلکار شہری کو سر کہہ کر مخاطب کرے گا اور جناب یا سر کے بغیر بات کرنا ممنوع ہوگا۔ شاباش یا سزا کے فیصلے عوام کے سامنے دیے جائیں گے، تاکہ ہر کارروائی میں شفافیت برقرار رہے۔
شکایات کے ازالے اور آن لائن ٹریکنگ
اجلاس میں پنجاب میں ایف آئی آر کی آن لائن ٹریکنگ سسٹم متعارف کرانے کا فیصلہ بھی کیا گیا۔ اس کا مقصد یہ ہے کہ شہری اپنی شکایات کو دو سے تین گھنٹے کے اندر حل ہونے کی یقین دہانی حاصل کر سکیں، اور ہر مسئلہ شفاف طریقے سے نمٹایا جائے۔
پنجاب پولیس کا اے ٹی سی ججز کی سکیورٹی کے لیے نئی گاڑیاں خریدنے کا فیصلہ
عوام دوست پولیسنگ کا فلسفہ
مریم نواز نے واضح کیا کہ پولیس کو صرف مجرموں سے ڈرنا چاہیے، عوام کے لیے اسے مددگار اور دوستانہ ہونا ضروری ہے۔ انہوں نے کہا کہ کسی خاتون کو غیر محفوظ محسوس کرنے کی اجازت نہیں دی جائے گی، شکایت کرنے والی خواتین کی تذلیل نہیں بلکہ حوصلہ افزائی کی جائے گی، اور وی آئی پی راستے سے عوام کو ہٹانے کی کوئی اجازت نہیں ہوگی۔
اصلاحات کی حکمت عملی
وزیراعلیٰ نے پولیس اصلاحات کے لیے مختصر، وسط اور طویل مدتی حکمت عملی بنانے کا بھی حکم دیا، تاکہ نہ صرف موجودہ مسائل کا حل ممکن ہو بلکہ مستقبل میں پولیسنگ کا نظام مکمل طور پر شفاف اور عوام دوست بن سکے۔ یہ اقدامات پنجاب میں پولیس کی کارکردگی اور عوامی اعتماد کو بڑھانے میں اہم کردار ادا کریں گے۔
