پنجاب حکومت نے موٹر سائیکل اور گاڑیوں کی رجسٹریشن اور ٹرانسفر کے لیے نیا ڈیجیٹل نظام نافذ کر دیا ہے، جس کے تحت گاڑی کی رجسٹریشن براہِ راست مالک کے شناختی کارڈ پر منتقل کی جائے گی۔ اس نظام کا باضابطہ آغاز آج، یکم ستمبر 2025 سے کر دیا گیا ہے۔
نئے سسٹم کے تحت شہری اب اپنی گاڑی یا موٹر سائیکل کے رجسٹریشن نمبر کو اپنے پاس رکھ سکیں گے اور اسے اگلی خریدی گئی گاڑی پر منتقل کر سکیں گے۔ پرانے نمبر کے بجائے نئے نمبر کے اجرا پر معمولی فیس لی جائے گی۔
ایکسائز حکام کا کہنا ہے کہ رجسٹریشن کو گاڑی کے چیسز نمبر سے ہٹا کر شناختی کارڈ سے منسلک کیا گیا ہے تاکہ سیکیورٹی خدشات پر قابو پایا جا سکے اور گاڑی کے مکمل ریکارڈ تک مالک کو براہ راست رسائی حاصل ہو۔
فیس کی تفصیل
- استعمال شدہ گاڑی خریدنے پر نیا نمبر جاری ہوگا
- موٹر سائیکل پر اضافی فیس: 1,000 روپے
- گاڑیوں پر انجن کی سی سی کے مطابق فیس: 1,000 سے 6,000 روپے تک
ایکسائز ڈیپارٹمنٹ کے ترجمان کے مطابق شہری اپنے پسندیدہ نمبرز کو دو سال تک اپنے شناختی کارڈ پر بغیر کسی گاڑی کے محفوظ رکھ سکتے ہیں۔ مقررہ مدت کے بعد اگر نمبر کسی گاڑی پر منتقل نہ کیا گیا تو اس کی معیاد ختم تصور ہوگی۔
فائدے
- من پسند نمبر دوبارہ استعمال کے قابل
- مہنگے نمبرز کی نئی گاڑی پر منتقلی کی اجازت
- لاکھوں روپے کی بچت ممکن
- خرید و فروخت میں شفافیت اور آسانی
پنجاب میں اس جدید نظام کے نفاذ سے نہ صرف شہریوں کو سہولت ملے گی بلکہ گاڑیوں کے ریکارڈ میں شفافیت اور سیکیورٹی میں بھی بہتری آئے گی۔
