وزیر خزانہ پنجاب مجتبیٰ شجاع الرحمان نے کہا ہے کہ حالیہ سیلاب سے متاثرہ خاندانوں کو بجلی کے بلز اور مختلف ٹیکسز میں خصوصی رعایت دی جائے گی۔
انہوں نے یہ اعلان لاہور کے علاقے چوہنگ میں قائم سیلاب متاثرین کے کیمپ کے دورے کے دوران کیا۔
وزیر خزانہ کا کہنا تھا کہ پنجاب حکومت سیلاب متاثرین کو ہرگز تنہا نہیں چھوڑے گی اور انہیں ایک باقاعدہ ریلیف پیکیج کے تحت مکمل مدد فراہم کی جائے گی۔ انہوں نے کہا کہ متاثرہ خاندانوں کے لیے حکومتی اقدامات صرف وقتی نہیں بلکہ ان کی مکمل بحالی تک جاری رہیں گے۔
اپنے خطاب میں صوبائی وزیر نے کہا کہ عید میلاد النبی ﷺ کا موقع ہمیں صبر، بھائی چارے اور خدمتِ خلق کا درس دیتا ہے، اور حکومت اس موقع پر عوام کے دکھ درد میں حقیقی معنوں میں شریک ہو رہی ہے۔
مجتبیٰ شجاع الرحمان نے متاثرین کو یقین دلایا کہ ان کے روزمرہ مسائل کے حل اور بنیادی سہولیات کی فراہمی کے لیے تمام دستیاب وسائل بروئے کار لائے جائیں گے۔ ان کا کہنا تھا کہ متاثرہ افراد کی بحالی حکومت کی اولین ترجیح ہے۔
سیلاب متاثرین کے لیے بجلی بلوں میں 70 فیصد تک رعایت کا اعلان
کیمپ میں موجود متاثرین نے وزیر خزانہ کے دورے پر اطمینان کا اظہار کیا اور حکومت کی جانب سے کیے جانے والے ریلیف اقدامات کو سراہا۔
