19
پنجاب حکومت نے فرائض کی انجام دہی کے دوران شہید ہونے والے 17 پولیس ملازمین کے لیے شہدا پیکج کی منظوری دے دی ہے۔
وزیر قانون پنجاب ملک صہیب احمد کی زیر صدارت اجلاس میں شہدا کے ورثا کو مالی اور رہائشی مراعات دینے کا فیصلہ کیا گیا۔
ملک صہیب احمد نے اعلان کیا کہ پیکج ٹو کے تحت اے ایس آئی کے ورثا کو 50 لاکھ روپے، گھر اور دیگر مراعات فراہم کی جائیں گی۔ جبکہ شہید کانسٹیبل اور ہیڈ کانسٹیبل کے ورثا کو 40 لاکھ روپے کے ساتھ گھر اور دیگر سہولیات دی جائیں گی۔
مزید برآں، پیکج تھری کے تحت شہید کانسٹیبل اور ٹریفک وارڈن کے ورثا کو 35 لاکھ روپے اور دیگر مراعات دی جائیں گی۔
صوبائی وزیر نے بتایا کہ پیکج تھری کیٹیگری کے شہدا کو بھی گھر کی سہولت دینے کے لیے رولز میں تبدیلی کا فیصلہ کیا گیا ہے، جس کے لیے پنجاب کابینہ سے منظوری لی جائے گی۔
