اگر ڈیم بناتے تو سیلاب سے بچ جاتے، سستی بجلی بھی میسر ہوتی: گورنر پنجاب

لاہور، گورنر پنجاب سردار سلیم حیدر خان نے کہا ہے کہ ملک میں ڈیمز کی تعمیر وقت کی اہم ضرورت ہے، اگر ماضی میں ڈیمز بنائے جاتے تو آج سیلابی تباہ کاریوں سے بچاؤ کے ساتھ ساتھ سستی بجلی بھی میسر ہوتی۔

لاہور میں دریائے راوی کے کنارے میڈیا سے گفتگو کرتے ہوئے گورنر پنجاب نے کہا کہ ہماری بدقسمتی ہے کہ ہم ڈیمز تعمیر نہیں کر سکے۔ انہوں نے کہا کہ کچھ ڈیمز زیرتعمیر ہیں جبکہ مزید چھوٹے ڈیمز بھی بنائے جا رہے ہیں، تاہم ڈیمز کی تعمیر کے لیے ہنگامی بنیادوں پر اقدامات ناگزیر ہیں۔

سردار سلیم حیدر خان نے زور دیا کہ ملک بھر میں ڈیمز کی تعمیر کے لیے بجٹ میں کٹوتی کر کے ترجیحی بنیادوں پر فنڈز مختص کیے جائیں۔ ان کا کہنا تھا کہ یہ ہماری نااہلی ہے کہ ہم نے اب تک اس اہم مسئلے پر سنجیدگی نہیں دکھائی۔

سیلابی صورتحال پر بات کرتے ہوئے گورنر پنجاب نے کہا کہ اگر جسڑ کے مقام پر کوئی ریلیف کیمپ قائم نہیں کیا گیا تو اس پر فوری ایکشن لیا جائے گا۔ انہوں نے کہا کہ موجودہ سیلابی صورتحال 30 سال بعد پیدا ہوئی ہے، تمام ادارے الرٹ ہیں اور وزیراعظم کے اقدامات کو عوام کی جانب سے سراہا جا رہا ہے۔