وزیراعلیٰ پنجاب مریم نواز نے صوبے کے تمام اسکولوں میں مصنوعی ذہانت (اے آئی) کے استعمال کو لازمی قرار دیتے ہوئے کہا ہے کہ ڈیجیٹل ٹیکنالوجی تعلیم، پالیسی سازی اور سرکاری اصلاحات میں نئے معیار قائم کر سکتی ہے۔
یہ اعلان انہوں نے “امپاورنگ پنجاب ود اے آئی” کے عنوان سے منعقدہ ورکشاپ میں خطاب کرتے ہوئے کیا، جس میں صوبائی وزرا، کابینہ کے ارکان اور گوگل کی ٹیم نے شرکت کی۔ ورکشاپ کے دوران پنجاب میں گوگل ٹیک ویلی ڈیجیٹل ٹرانسفارمیشن ایڈوائزری بورڈ کے قیام کا بھی فیصلہ کیا گیا۔
وزیراعلیٰ مریم نواز نے کہا کہ اے آئی ٹولز کا ذمہ داری سے استعمال مثبت اور پائیدار تبدیلیاں لا سکتا ہے اور صوبائی حکومت ڈیجیٹل گورننس کو فروغ دینے کے لیے عملی اقدامات کر رہی ہے۔ ورکشاپ میں کابینہ ارکان کو گوگل کے جدید اے آئی ٹول “جیمنائی” کے مفید اور ذمہ دارانہ استعمال پر بریفنگ دی گئی۔
اس موقع پر بتایا گیا کہ گوگل فار ایجوکیشن کے پلیٹ فارم کے تحت پنجاب بھر میں 3 ہزار اساتذہ کی ماسٹر ٹریننگ مکمل ہو چکی ہے، محکمہ اسکول ایجوکیشن میں 3 لاکھ سے زائد طلبہ کی اسٹوڈنٹ آئی ڈیز قائم کی گئی ہیں، جبکہ پنجاب ایجوکیشن فاؤنڈیشن کے تحت 2 لاکھ طلبہ اور 2 ہزار اساتذہ کو جدید ڈیجیٹل تربیت دی گئی۔
ضلعی انتظامیہ جہلم کا بڑا تعلیمی قدم، اساتذہ و طلبہ کیلئے AI پر مشتمل پروفیشنل ٹریننگ کورس کا افتتاح
ورکشاپ میں آپریشنل پالیسی سازی، شعبہ جاتی اصلاحات اور دیگر سرکاری امور میں اے آئی کے استعمال پر تفصیلی تبادلہ خیال بھی ہوا۔ اس کے علاوہ ڈیجیٹل صحافت کے فروغ کے لیے 10 میڈیا آرگنائزیشنز کے تحت ایک ہزار اسکالرشپس فراہم کرنے کی بھی بریفنگ دی گئی۔
گوگل ٹیم نے لاہور کی تاریخی اور ثقافتی خوبصورتی کو سراہتے ہوئے کہا کہ لاہور جیسا شہر دنیا میں کہیں اور نہیں دیکھا، اور یہ تاریخ اور ثقافت کا حسین امتزاج پیش کرتا ہے۔
یہ اقدام صوبے میں تعلیمی معیار بلند کرنے، اساتذہ اور طلبہ کو جدید ڈیجیٹل مہارتوں سے لیس کرنے اور پنجاب کو ڈیجیٹل گورننس میں ماڈل صوبہ بنانے کے لیے اٹھایا گیا ہے۔
