محکمہ داخلہ پنجاب نے عیدالاضحیٰ کے دوران عارضی جھولوں پر مکمل پابندی لگا دی، تفریحی پارکس میں مستقل جھولوں کے لیے فٹنس سرٹیفکیٹ لازمی قرار۔
لاہور سے موصولہ اطلاعات کے مطابق، محکمہ داخلہ پنجاب نے عیدالاضحیٰ کے دوران شہریوں کی حفاظت کو مدِنظر رکھتے ہوئے صوبہ بھر میں عارضی طور پر لگائے جانے والے مکینیکل جھولوں پر مکمل پابندی عائد کر دی ہے۔ اس حوالے سے تمام ڈپٹی کمشنرز کو ہدایات جاری کر دی گئی ہیں کہ وہ اپنے اپنے اضلاع میں اس حکم پر سختی سے عملدرآمد کروائیں۔
محکمہ داخلہ کی جانب سے جاری کردہ ہدایت نامے کے مطابق صرف وہ مکینیکل جھولے جنہیں تفریحی پارکس میں مستقل بنیادوں پر نصب کیا گیا ہے، اور جن کے پاس فٹنس سرٹیفکیٹ موجود ہے، وہی استعمال میں رہیں گے۔ تمام مالکان یا آپریٹرز کو ہدایت کی گئی ہے کہ وہ متعلقہ ڈپٹی کمشنرز سے جھولوں کا فٹنس سرٹیفکیٹ حاصل کریں تاکہ یہ یقینی بنایا جا سکے کہ تمام جھولے حفاظتی معیارات پر پورا اترتے ہیں۔
محکمہ داخلہ نے واضح کیا ہے کہ یہ پابندی صرف اُن عارضی جھولوں پر عائد کی گئی ہے جو عید کی تعطیلات کے دوران سڑک کنارے یا کھلے میدانوں میں بغیر کسی حفاظتی معیار کے نصب کیے جاتے ہیں، ان جھولوں میں اوور لوڈنگ اور فنی خرابیوں کے باعث اکثر حادثات پیش آتے ہیں، جس سے قیمتی انسانی جانوں کو خطرہ لاحق ہوتا ہے۔
اعلان میں مزید کہا گیا ہے کہ مستقل جھولے جن کی حفاظت کے تمام پروٹوکولز پر عمل کیا جا رہا ہے، اُن پر کوئی پابندی نہیں لگائی گئی، تاہم، ان جھولوں کی باقاعدہ جانچ اور اجازت ضروری ہوگی تاکہ کسی بھی ممکنہ حادثے سے بچا جا سکے۔
یاد رہے کہ ماضی میں عید کے موقع پر عارضی جھولوں کے حادثات میں کئی بچے اور افراد زخمی یا جاں بحق ہو چکے ہیں، جس کے پیش نظر حکومت نے اس بار پیشگی حفاظتی اقدامات سخت کرنے کا فیصلہ کیا ہے۔
