سپیکر پنجاب اسمبلی ملک محمد احمد خان نے کہا ہے کہ اپوزیشن کا انتخابی عمل کا بائیکاٹ کرنا ان کا سیاسی فیصلہ اور صوابدید ہے، تاہم چونکہ اپوزیشن نے اپنے امیدوار الیکشن کمیشن سے ریٹائر نہیں کیے، اس لیے انتخابی عمل کرانا ضروری ہوگیا ہے۔
پنجاب اسمبلی کے اجلاس کے دوران میڈیا سے غیر رسمی گفتگو میں سپیکر نے کہا کہ وہ سیاسی عمل کے حامی ہیں اور بائیکاٹ جیسے اقدامات عوامی نمائندگی اور ان کے حقوق سے دوری کا باعث بنتے ہیں۔
ملک محمد احمد خان نے سابق وزیراعظم میاں نواز شریف کے ساتھ ہونے والے سلوک پر شدید تحفظات کا اظہار کرتے ہوئے کہا کہ میاں نواز شریف سے اتنا انتقام کسی اور سیاسی رہنما کے ساتھ نہیں لیا گیا، ن لیگ کے رہنماؤں پر ناجائز مقدمات بنائے گئے اور ان کے گھر بھی جلائے گئے۔
انہوں نے 9 مئی کے واقعات کا حوالہ دیتے ہوئے کہا کہ ریاست پر حملے ہوئے، کور کمانڈر اور رانا ثناء اللہ کے گھروں پر بھی حملے کیے گئے، جو ایک خطرناک رجحان ہے اور اس کی سخت مذمت ہونی چاہیے۔
سپیکر نے حالیہ واقعے میں پنجاب اسمبلی کی رکن علیمہ خان پر انڈا پھینکے جانے کی بھی شدید مذمت کی اور کہا کہ اس قسم کی ذاتی حملے سیاسی اختلافات سے بالاتر ہیں اور اس میں ملوث افراد کے خلاف سخت کارروائی ہونی چاہیے۔
