سینئر وزیر مریم اورنگزیب کا کہنا ہے کہ 14 اگست کو وزیرِ اعلیٰ مریم نواز معرکۂ حق پارک اور میوزیم کی نقاب کشائی کریں گی، پنجاب بھر میں جشنِ آزادی تاریخی انداز میں منانے کی تیاریاں مکمل۔
لاہور، پنجاب کی سینئر وزیر مریم اورنگزیب نے کہا ہے کہ قوم اس بار یومِ آزادی تاریخی جوش و جذبے سے منائے گی۔
جشنِ آزادی کی تیاریوں سے متعلق بیان میں انہوں نے بتایا کہ 14 اگست کو وزیرِ اعلیٰ پنجاب مریم نواز معرکۂ حق پارک اور میوزیم کا افتتاح کریں گی۔ مریم نواز نے ہدایت دی ہے کہ جشنِ آزادی کو مثالی انداز میں منایا جائے، جس کے لیے صوبے بھر میں تقریبات کو حتمی شکل دے دی گئی ہے۔
مریم اورنگزیب کے مطابق اضلاع کے درمیان خوبصورت چراغاں اور آزادی فلوٹس کے مقابلے ہوں گے، سب سے بہترین فلوٹ، چراغاں اور خوبصورتی سے سجائے گئے بازار کو انعامات دیے جائیں گے۔
انہوں نے کہا کہ پنجاب میں ڈویژن، اضلاع اور تحصیل کی سطح پر تیاریوں کا سلسلہ زور و شور سے جاری ہے، نوجوانوں اور بچوں کا جوش و خروش قابلِ تحسین ہے، جبکہ تعلیمی اداروں اور شہری تنظیموں کو تقریبات کے انعقاد کے لیے مکمل سہولیات فراہم کی جا رہی ہیں۔
سینئر وزیر نے مزید کہا کہ ضلعی انتظامیہ اور تمام ادارے 14 اگست کی تیاریوں میں باہمی اشتراک سے خدمات انجام دے رہے ہیں، اور آزادی کا تحفظ، جشن کو مزید پرجوش بنا رہا ہے۔
