کوئٹہ: پاکستان تحریک انصاف (پی ٹی آئی) نے 7 نومبر 2025 کو کوئٹہ کے ہاکی گراؤنڈ میں بڑا جلسہ منعقد کرنے کا اعلان کر دیا ہے۔ اس بات کا اعلان پی ٹی آئی بلوچستان کے صوبائی صدر داؤد شاہ کاکڑ نے کوئٹہ میں پریس کانفرنس کے دوران کیا۔
انہوں نے کہا کہ جلسے کے انعقاد کے لیے تمام قانونی تقاضے پورے کیے جائیں گے اور عدالتوں سے باقاعدہ اجازت حاصل کی جائے گی۔ داؤد شاہ کا کہنا تھا کہ موجودہ سیکیورٹی صورتحال، خاص طور پر بلوچستان میں، باعثِ تشویش ہے اور پارٹی کارکنوں کو دہشتگردی کے جھوٹے مقدمات میں ملوث کیا جا رہا ہے۔
ان کا مزید کہنا تھا کہ "ملک میں سیاسی آزادی کا گلا گھونٹا جا رہا ہے، لیکن ہم آئینی اور قانونی حدود میں رہتے ہوئے اپنا پیغام عوام تک پہنچائیں گے۔”
تحریک انصاف کی جانب سے اس جلسے کو عوامی رابطہ مہم کا حصہ قرار دیا جا رہا ہے، جس کا مقصد صوبے میں پارٹی کی سیاسی سرگرمیوں کو فعال بنانا ہے۔
