پاکستان تحریک انصاف (پی ٹی آئی) کی سینیٹ میں پارلیمانی پارٹی نے 27 ویں آئینی ترمیم کے خلاف مزاحمت اور احتجاج کا فیصلہ کر لیا ہے۔ اسلام آباد میں ہونے والے اجلاس میں عون عباس بپی، اعظم سواتی، فلک ناز چترالی اور فوزیہ ارشد شریک ہوئے جبکہ بیرسٹر علی ظفر اڈیالا جیل میں ملاقات کے باعث اجلاس میں شامل نہیں ہو سکے۔
اجلاس میں 27 ویں آئینی ترمیم کے علاوہ این ایف سی ایوارڈ اور اپوزیشن لیڈر کی تعیناتی کے امور پر بھی بات چیت ہوئی۔ پی ٹی آئی کے ارکان نے فیصلہ کیا کہ اپوزیشن لیڈر کی تعیناتی کے موقع پر سینیٹ میں احتجاج کیا جائے گا، اور اپوزیشن بینچز کی تعداد پر بھی سوالات اٹھائے جائیں گے۔
27 ویں آئینی ترمیمی بل 7 نومبر کو سینیٹ اجلاس میں پیش کیا جائے گا
ذرائع کے مطابق اجلاس میں یہ بھی طے پایا کہ بلوچستان عوامی پارٹی کے اپوزیشن بینچ پر ہونے کے باوجود وزارتیں حاصل کرنے پر بھی سینیٹ میں سوالات اٹھائے جائیں گے۔ بتایا گیا ہے کہ 27 ویں آئینی ترمیمی بل 7 نومبر کو سینیٹ اجلاس میں پیش کیا جائے گا۔
