سابق وفاقی وزیر اور سینیٹر فیصل واوڈا نے الزام عائد کیا ہے کہ خیبرپختونخوا اور پاکستان تحریک انصاف (پی ٹی آئی) کی قیادت عمران خان کو جیل میں رکھنے میں کامیاب ہوچکی ہے، جبکہ خود اقتدار کے مزے لوٹ رہی ہے۔
پارلیمنٹ ہاؤس کے باہر میڈیا سے گفتگو کرتے ہوئے واوڈا کا کہنا تھا کہ پی ٹی آئی کا اصل چہرہ اب قوم کے سامنے آچکا ہے۔ انہوں نے طنزیہ انداز میں کہا کہ شاہ محمود قریشی کا چہرہ دیکھا کریں، وہ ملک کے وزیر خارجہ بھی رہ چکے ہیں۔
فیصل واوڈا نے مولانا فضل الرحمان کے اُس بیان کی تائید کی جس میں انہوں نے کہا تھا کہ خیبرپختونخوا کے سرکاری فنڈز کا 10 فیصد مسلح گروہوں کو دیا گیا۔ واوڈا کا کہنا تھا کہ یہ معاملہ صرف ایک صوبے تک محدود نہیں، اگر تمام صوبوں کے فنڈز کی چھان بین کی جائے تو بہت بڑا اسکینڈل سامنے آسکتا ہے۔
انہوں نے الزام لگایا کہ خیبرپختونخوا اور پی ٹی آئی قیادت نے پارٹی بانی کو جیل میں رکھنے کا منصوبہ بنایا تاکہ وہ خود اقتدار سے لطف اندوز ہوتے رہیں۔ "تحریک انصاف والے نعرہ لگاتے تھے کہ سارے چور ہیں، سارے بے ایمان ہیں، مگر خیبرپختونخوا میں سینیٹ نشستوں پر جو سیاسی کھیل کھیلا گیا وہ سب کے سامنے ہے۔”
مسلم لیگ (ن) کا رانا ثنااللہ کو سینیٹ کا امیدوار نامزد کرنے کا فیصلہ
دہشت گردی کے خلاف آپریشن کے حوالے سے ان کا کہنا تھا کہ "فیلڈ مارشل کی سربراہی میں پاک فوج ملک کو بچاتی رہے گی۔ دہشت گردوں کے خلاف آپریشن رکے گا نہیں بلکہ مزید تیز ہوگا، اور جو کوئی بھی اس تسلسل کو روکنے کی کوشش کرے گا، چاہے وہ کتنا بھی بڑا طرم خان کیوں نہ ہو، اسے رگڑ دیا جائے گا۔”
