اسلام آباد ہائیکورٹ نے بانی پاکستان تحریک انصاف کے ایکس اکاؤنٹ بند کرنے کے کیس کی سماعت کے بعد اسے مزید 24 فروری تک ملتوی کر دیا۔ کیس کی سماعت جسٹس ارباب محمد طاہر کی سربراہی میں ہوئی، جس دوران جیل حکام، پی ٹی اے اور دیگر فریقین کے جوابات موصول ہونے کے بعد عدالت نے یہ فیصلہ کیا۔
نجی ٹی وی چینل کے مطابق، وکیل سلمان اکرم راجا نے عدالت کو بتایا کہ کیس فائل ہونے کے بعد انہیں بانی پی ٹی آئی سے مشاورت کے لیے ملاقات کی اجازت نہیں دی گئی۔ عدالت نے ہدایت کی کہ اگر ملاقات ہو جائے تو 24 فروری کو حتمی دلائل سنے جائیں گے۔
عدالت نے ملاقات نہ کرانے پر دائر توہین عدالت کی درخواست پر تفصیلی جواب جمع کرانے کی ہدایت بھی دی اور ایڈووکیٹ جنرل اسلام آباد آفس سے تحریری جواب طلب کیا۔ سرکاری وکیل نے بتایا کہ ملاقات کے کیسز ایک لارجر بنچ دیکھ رہا ہے اور جب تک ملاقات نہیں ہوگی، کیس آگے نہیں بڑھ سکے گا۔
عمران خان کے ایکس اکاؤنٹ کے استعمال میں احتیاط ضروری ہے، علی محمد خان
سلمان اکرم راجا نے عدالت سے استدعا کی کہ جیل میں ملاقات کے لیے مناسب آرڈر جاری کیا جائے، کیونکہ 4 نومبر کو ملاقات کا آرڈر دیا گیا تھا لیکن اس پر عمل نہیں ہوا۔
