10
اسلام آباد کی ڈسٹرکٹ اینڈ سیشن کورٹس نے بانی پی ٹی آئی اور اُن کی اہلیہ بشریٰ بی بی کی گرفتاری 9 مئی سمیت دیگر 5 مقدمات میں 23 دسمبر تک روک دی ہے۔ عدالت نے دونوں شخصیات کی ضمانت قبل از گرفتاری میں بھی توسیع کر دی۔
ایڈیشنل ڈسٹرکٹ اینڈ سیشن جج محمد افضل مجوکہ نے کیس کی سماعت کی، تاہم بانی پی ٹی آئی کی عدم دستیابی کے باعث وکلا دلائل پیش نہ کر سکے، جس کے بعد عدالت نے سماعت 23 دسمبر تک ملتوی کر دی۔
عدالتی حکم کے مطابق آئندہ سماعت پر بانی پی ٹی آئی کو عدالت کے روبرو یا ویڈیو لنک کے ذریعے پیش کرنے کی ہدایت جاری کی گئی ہے۔
یاد رہے کہ بانی پی ٹی آئی کے خلاف 9 مئی کے واقعات، اقدامِ قتل اور جعلی رسیدوں سمیت متعدد مقدمات درج ہیں، جبکہ بشریٰ بی بی پر بھی مبینہ جعلی رسیدیں جمع کروانے کا کیس زیرِ سماعت ہے۔
