پاکستان تحریک انصاف (پی ٹی آئی) نے ملک بھر میں ہونے والے آئندہ ضمنی انتخابات میں بھرپور حصہ لینے کا فیصلہ کیا ہے۔ یہ فیصلہ پارٹی کی سیاسی کمیٹی کے اجلاس میں کیا گیا، جس کی صدارت معروف قانونی ماہر سلمان اکرم راجہ نے کی۔
ذرائع کے مطابق اجلاس میں شریک ارکان نے اس بات پر اتفاق کیا کہ پی ٹی آئی کسی بھی سیاسی فورم کو خالی نہیں چھوڑے گی اور انتخابی سیاست میں متحرک کردار ادا کرتی رہے گی۔ کمیٹی نے واضح کیا کہ پارٹی کو ہر سطح پر سیاسی سرگرمیوں میں مکمل حصہ لینا چاہیے تاکہ عوامی نمائندگی کا تسلسل برقرار رہے۔
اجلاس میں یہ بھی سفارش کی گئی کہ جن نشستوں پر پی ٹی آئی کے اراکین سزا یا نااہلی کے باعث فارغ ہوں گے، ان پر متبادل امیدوار انہی اراکین کی مشاورت سے منتخب کیے جائیں گے۔ اس عمل کا مقصد پارٹی کی داخلی ہم آہنگی کو برقرار رکھنا اور کارکنوں کے اعتماد کو بحال رکھنا ہے۔
علاوہ ازیں، اجلاس میں قومی اسمبلی میں اپوزیشن لیڈر کی نامزدگی کے حوالے سے بھی مشاورت کی گئی۔ سیاسی کمیٹی نے اس حوالے سے حتمی فیصلے کو عدالتی فیصلوں کے اعلان تک مؤخر کرنے کی تجویز دی ہے۔
بانی پی ٹی آئی نے ضمنی انتخابات میں حصہ نہ لینے کا اعلان کر دیا، علیمہ خان
ذرائع کے مطابق، کمیٹی کے اکثر ارکان نے اپوزیشن لیڈر کے لیے محمود خان اچکزئی کے نام پر تحفظات کا اظہار کیا اور تجویز دی کہ پی ٹی آئی کے اندر سے ہی کسی موزوں رکن کو یہ ذمہ داری سونپی جائے۔
کمیٹی کا کہنا ہے کہ عدالتی عمل مکمل ہونے کے بعد ہی قیادت سے متعلق کوئی بھی نیا فیصلہ کیا جائے گا تاکہ قانونی پیچیدگیوں سے بچا جا سکے اور جماعت کی پوزیشن مستحکم رہے۔
