پی ٹی اے کی شہریوں کو جعلی کوریئر سروسز کے جعلی پیغامات سے محتاط رہنے کی ہدایت
اسلام آباد: پاکستان ٹیلی کمیونیکیشن اتھارٹی (پی ٹی اے) نے عوام کو خبردار کیا ہے کہ وہ خود کو جعلی کوریئر کمپنیوں کی جانب سے موصول ہونے والے مشتبہ پیغامات اور کالز سے ہوشیار رکھیں۔
پی ٹی اے کی جانب سے جاری کردہ اعلامیے میں کہا گیا ہے کہ بعض نامعلوم افراد خود کو کوریئر کمپنیوں کا نمائندہ ظاہر کرتے ہوئے شہریوں کو فون کرتے ہیں اور ان سے ویریفکیشن کوڈ یا دیگر حساس معلومات حاصل کرنے کی کوشش کرتے ہیں۔
اتھارٹی نے واضح کیا ہے کہ اصلی اور معتبر کوریئر کمپنیاں صارفین سے کسی قسم کے کوڈ یا ذاتی معلومات کی طلب نہیں کرتیں۔ شہریوں کو ہدایت کی گئی ہے کہ وہ کسی بھی مشکوک ایس ایم ایس یا میسجنگ ایپ کے ذریعے موصول ہونے والے کوڈ کو کسی کے ساتھ ہرگز شیئر نہ کریں، کیونکہ ایسے کوڈز کا غلط استعمال کرکے آپ کے ذاتی اکاؤنٹس یا ڈیجیٹل شناخت تک رسائی حاصل کی جا سکتی ہے۔
پی ٹی اے نے عوام سے اپیل کی ہے کہ وہ اس قسم کی کوششوں سے خبردار رہیں اور کسی مشتبہ رابطے کی صورت میں متعلقہ حکام کو اطلاع دیں۔
