پنجاب اسمبلی اجلاس میں رکن اسمبلی اقبال خٹک نے انکشاف کیا کہ میانوالی کے پرائمری سکولوں میں بچے منشیات استعمال کر رہے ہیں، چرس اور ہیروئن تک رسائی پر تشویش کا اظہار کیا گیا۔
لاہور، پنجاب اسمبلی کے اجلاس میں ایک سنجیدہ اور تشویشناک مسئلے پر بحث ہوئی جب اپوزیشن رکن اقبال خٹک نے میانوالی کے اسکولوں میں منشیات کے استعمال کا انکشاف کیا۔
اپنی تقریر کے دوران اقبال خٹک نے کہا کہ میرے علاقے کے سکولوں میں چرس اور ہیروئن جیسے زہر کا استعمال ہو رہا ہے، اور یہ بات انتہائی خوفناک ہے کہ پرائمری سطح کے معصوم بچے اس لعنت کا شکار ہو رہے ہیں۔
انہوں نے حکومت سے سوال کیا کہ یہ منشیات میانوالی کے بچوں تک کیسے پہنچیں؟ ہمیں بتایا جائے کہ پولیس نے اس سلسلے میں اب تک کیا اقدامات کیے ہیں؟
اقبال خٹک نے زور دیتے ہوئے کہا کہ "منشیات کو پھیلانے والوں کا فوری تدارک کیا جائے تاکہ آنے والی نسل کو اس تباہی سے بچایا جا سکے۔
یاد رہے کہ پاکستان میں اسکولوں اور کالجوں میں منشیات کے پھیلاؤ کے حوالے سے ماضی میں بھی مختلف رپورٹس سامنے آتی رہی ہیں، تاہم یہ پہلا موقع ہے کہ پرائمری اسکول کے بچوں میں چرس اور ہیروئن کے استعمال کا باقاعدہ طور پر اسمبلی کے فلور پر انکشاف کیا گیا ہے، جو ایک خطرناک رجحان کی نشاندہی کرتا ہے۔
