49
پاکستان مسلم لیگ ن نے آزاد جموں و کشمیر کی موجودہ حکومت سے علیحدگی کا اعلان کرتے ہوئے واضح کیا ہے کہ وہ کسی نئی حکومت میں حصہ نہیں لیں گے۔
صدر مسلم لیگ ن آزاد کشمیر شاہ غلام قادر نے کہا کہ اگر پیپلز پارٹی تحریک عدم اعتماد لاتی ہے تو یہ ان کا جمہوری حق ہے، تاہم مسلم لیگ ن کسی غیر فطری حکومت سازی یا نئی حکومت میں شامل نہیں ہوگی اور اب اپوزیشن میں بیٹھے گی۔
شاہ غلام قادر نے مزید کہا کہ جو بھی پارٹی پالیسی سے انحراف کرے گا، اسے پارٹی کارروائی کا سامنا کرنا پڑے گا۔ ان کا کہنا تھا کہ آزاد کشمیر میں مضبوط حکومت صرف شفاف عام انتخابات کے ذریعے ممکن ہے۔
صدر مسلم لیگ ن آزاد کشمیر نے کہا کہ جماعت آئینی و سیاسی بحران کے حل میں مثبت کردار ادا کرتی رہے گی اور آزاد کشمیر میں مہاجرین اور بیرون ملک کشمیریوں کی فلاح و بہبود کے لیے سرگرم رہے گی۔ انہوں نے مزید کہا کہ نواز شریف اور شہباز شریف کی قیادت میں انتخابی مہم بھرپور انداز میں چلائی جائے گی۔
