وزیراعظم شہباز شریف آج سعودی عرب کے تین روزہ دورے پر روانہ ہوں گے، جہاں وہ فیوچر انویسٹمنٹ کانفرنس کے نویں ایڈیشن میں شرکت کریں گے۔ یہ دورہ سعودی ولی عہد اور وزیراعظم محمد بن سلمان کی خصوصی دعوت پر ہو رہا ہے۔
دفتر خارجہ کے ترجمان کے مطابق وزیراعظم 27 تا 29 اکتوبر تک ریاض میں قیام کریں گے۔ کانفرنس کا موضوع "خوشحالی کی کنجی، ترقی کی نئی سرحدوں کا انکشاف” رکھا گیا ہے، جس میں عالمی رہنما، سرمایہ کار، پالیسی ساز اور ماہرین شامل ہوں گے۔ اجلاسوں میں اختراع، پائیداری، اقتصادی شمولیت اور جغرافیائی تبدیلیوں پر تبادلہ خیال کیا جائے گا۔
دورے کے دوران وزیراعظم شہباز شریف سعودی ولی عہد محمد بن سلمان اور دیگر اعلیٰ رہنماؤں سے ملاقاتیں کریں گے، جن میں تجارت، سرمایہ کاری، توانائی اور افرادی وسائل کے شعبوں میں تعاون بڑھانے پر بات چیت ہوگی۔
وفد میں وفاقی وزراء بشمول اسحاق ڈار بھی شامل ہوں گے۔ وزیراعظم کا دورہ پاکستان کی سرمایہ کاری کی صلاحیت اور پائیدار ترقی کے وژن کو اجاگر کرنے کے ساتھ ساتھ علاقائی اور عالمی امور پر تبادلہ خیال کا بھی موقع فراہم کرے گا۔
