وزیراعظم شہباز شریف اور امریکی صدر ڈونلڈ ٹرمپ کے درمیان 25 ستمبر کو ایک اہم ملاقات کا امکان ظاہر کیا جا رہا ہے، جس میں پاکستانی فیلڈ مارشل عاصم منیر بھی شریک ہوں گے۔
ذرائع کے مطابق یہ ملاقات وزیراعظم کے اقوام متحدہ جنرل اسمبلی کے سالانہ اجلاس کے موقع پر ممکن ہے، جس کے لیے سفارتی اور سیاسی سطح پر کوششیں تیزی سے جاری ہیں اور کامیاب ہوتی دکھائی دے رہی ہیں۔
ذرائع نے بتایا کہ وزیراعظم اور فیلڈ مارشل عاصم منیر نے حالیہ دنوں میں قطر اور سعودی عرب کے دورے کیے، جن کے بعد یہ ملاقات متوقع ہے۔ اس ملاقات کو اسرائیلی حملوں اور دوحہ میں مسلم ممالک کی ہنگامی کانفرنس کے تناظر میں انتہائی اہم قرار دیا جا رہا ہے۔
اگرچہ صدر ٹرمپ 23 ستمبر کو جنرل اسمبلی سے خطاب اور عالمی رہنماؤں کے اعزاز میں استقبالیہ دیں گے، لیکن باخبر ذرائع کا کہنا ہے کہ تفصیلی ملاقات 25 ستمبر کو واشنگٹن میں ہوگی۔ ملاقات کے وقت، مقام اور ایجنڈے کو حتمی شکل دی جا رہی ہے۔
امریکا سے تاریخی تجارتی ڈیل پر وزیراعظم شہباز شریف کا ڈونلڈ ٹرمپ کو شکریہ
ذرائع کے مطابق اس ملاقات میں قطر پر اسرائیلی حملوں کے اثرات، مسلم دنیا کا ردعمل، پاکستان میں حالیہ سیلاب سے ہونے والی تباہ کاریاں، اور پاک بھارت تعلقات پر گفتگو متوقع ہے۔ ملاقات کے لیے قطر اور سعودی عرب کی مشاورت اور حمایت بھی حاصل ہے۔
ادھر پاکستانی سفارتخانے نے ممکنہ ملاقات پر کوئی تبصرہ یا تردید کرنے سے گریز کیا ہے۔ ملاقات کی تصدیق یا تردید آنے والے دنوں میں متوقع ہے۔
