اسلام آباد: وزیراعظم شہباز شریف آج جدید ٹیکنالوجی پر مبنی ڈیجیٹل معیشت کے فروغ کے لیے ایک نئے آئی ٹی پروگرام کا باضابطہ اجرا کریں گے۔
یہ اقدام ڈیجیٹل پاکستان وژن کے تحت کیا جا رہا ہے جس کا مقصد پاکستان کو خطے میں آئی ٹی کی ابھرتی ہوئی معیشت کے طور پر نمایاں کرنا اور نوجوانوں کو ڈیجیٹل دور کے تقاضوں سے ہم آہنگ بنانا ہے۔
پروگرام کے تحت ملک میں آئی ٹی انڈسٹری کے فروغ، فری لانسنگ، ای کامرس، اور سافٹ ویئر ڈویلپمنٹ کے شعبوں میں سہولیات پیدا کی جائیں گی۔ اس سے نوجوانوں کے لیے روزگار کے وسیع مواقع اور کاروباری ماحول میں ڈیجیٹل انقلاب کی راہ ہموار ہوگی۔
اسلام آباد میں منعقد ہونے والی تقریب میں وفاقی وزراء، آئی ٹی ماہرین، اور اسٹارٹ اپ نمائندگان شریک ہوں گے، جہاں وزیراعظم ڈیجیٹل پاکستان کے وژن پر روشنی ڈالیں گے اور مستقبل کے اہداف کا تعین کریں گے۔
حکومت نے وزیراعظم کی ہدایت پر جامع پالیسی فریم ورک تیار کیا ہے تاکہ آئی ٹی کے فروغ کے ذریعے قومی معیشت کو مضبوط بنیاد فراہم کی جا سکے۔
ماہرین کے مطابق یہ پروگرام پاکستان میں ٹیکنالوجی پر مبنی ترقی کے نئے دور کا آغاز ثابت ہوگا۔
