وزیراعظم محمد شہباز شریف سے وفاقی وزیر داخلہ سید محسن رضا نقوی نے اہم ملاقات کی، جس میں یومِ عاشور کے موقع پر ملک بھر میں سیکیورٹی کی صورتِ حال اور کیے گئے انتظامات پر بریفنگ دی گئی۔
ملاقات میں وزیر داخلہ نے وزیراعظم کو بتایا کہ یومِ عاشور کے دوران امن و امان کی فضا برقرار رکھنے کے لیے حکومت نے تمام ضروری اقدامات کیے، جن میں سیکیورٹی، عوامی سہولت، اور ایمرجنسی ریسپانس سسٹم شامل تھے۔
وزیراعظم نے اس موقع پر تمام صوبوں کے وزرائے اعلیٰ، خصوصاً مریم نواز (پنجاب)، مراد علی شاہ (سندھ)، علی امین گنڈاپور (خیبرپختونخوا)، میر سرفراز بگٹی (بلوچستان)، چوہدری انوار الحق (آزاد کشمیر)، اور گلگت بلتستان کے وزیراعلیٰ گلبر خان کو اُن کے علاقوں میں مؤثر اور منظم سیکیورٹی اقدامات پر خراجِ تحسین پیش کیا۔ وزیراعظم نے کہا کہ اُن کی مربوط کوششوں اور ذمہ دارانہ حکمتِ عملی کے باعث یومِ عاشور کا انعقاد پُرامن اور نظم و ضبط سے بھرپور ہوا۔
انہوں نے اس موقع پر صوبائی انتظامیہ، پولیس، سیکیورٹی فورسز اور رینجرز کی پیشہ ورانہ کارکردگی کو سراہتے ہوئے کہا کہ ان اداروں کی جامع منصوبہ بندی اور ہم آہنگی سے عوام کو محفوظ ماحول میسر آیا۔
حضرت امام حسینؓ کی جدوجہد حق و باطل کے معرکے کا ابدی پیغام ہے، مریم نواز
وزیر داخلہ محسن نقوی نے کہا کہ یومِ عاشور کے موقع پر سیکیورٹی کی سطح کو انتہائی حساس رکھا گیا تھا، اور کسی بھی ممکنہ خطرے سے نمٹنے کے لیے تمام ادارے چوکنا تھے۔ انہوں نے کہا کہ ملک کے تمام اضلاع میں سیکیورٹی، صفائی، ٹریفک مینجمنٹ اور طبی سہولیات پر خصوصی توجہ دی گئی۔
یاد رہے کہ ملک بھر میں یومِ عاشور کے جلوس پُرامن طور پر اختتام پذیر ہوئے، اور اس موقع پر عوام اور اداروں کے درمیان اعتماد کی فضا نمایاں رہی، جس پر حکومت کی کارکردگی کو مثبت انداز میں سراہا جا رہا ہے۔
