وزیرِ اعظم محمد شہباز شریف سے سبکدوش ہونے والے چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے الوداعی ملاقات کی۔ نجی ٹی وی کے مطابق ملاقات کے دوران وزیرِ اعظم نے جنرل ساحر شمشاد مرزا کی پیشہ ورانہ خدمات، قابلیت اور ملک کے لیے ان کی شاندار کاوشوں کو سراہا۔
جنرل ساحر شمشاد مرزا پاکستان کی مسلح افواج کے 18ویں اور آخری چیئرمین جوائنٹ چیفس آف اسٹاف کمیٹی ہیں، وہ 27 نومبر 2025 کو اپنی مدتِ ملازمت پوری کر کے عہدے سے سبکدوش ہوں گے۔ آئین میں کی گئی 27ویں ترمیم کے بعد اس عہدے پر مزید تقرری نہیں کی جائے گی۔
پاکستان کے پہلے چیئرمین جوائنٹ چیفس جنرل محمد شریف تھے، جنہیں سابق وزیراعظم ذوالفقار علی بھٹو نے مارچ 1976 میں مقرر کیا تھا۔ اس اہم عہدے پر پاک بحریہ سے ایڈمرل محمد شریف اور ایڈمرل افتخار احمد سروہی، جبکہ پاک فضائیہ سے ایئر چیف مارشل فاروق فیروز خان بھی خدمات انجام دے چکے ہیں۔
