اسلام آباد: وزیراعظم شہباز شریف نے ملک بھر میں گھریلو صارفین کے لیے گیس کنیکشنز کھولنے کا باضابطہ اعلان کر دیا۔
اسلام آباد میں منعقدہ آر ایل این جی گیس کنکشنز کے اجرا کی تقریب سے خطاب کرتے ہوئے وزیراعظم نے کہا کہ گھریلو صارفین کے لیے گیس کنیکشنز عوام کا دیرینہ مطالبہ تھا، جسے آج پورا کیا جا رہا ہے۔
شہباز شریف نے کہا کہ 2022 میں پی ڈی ایم حکومت کے دوران گیس کی فراہمی ایک بڑا چیلنج تھی۔ اُس وقت گیس دستیاب نہ ہونے کے باعث عوام سے معذرت کرنا پڑی، لیکن اب حالات بہتر ہیں اور حکومت نے فیصلہ کیا ہے کہ ملک بھر میں نئے گیس کنیکشنز کھولے جائیں۔
وزیراعظم نے بتایا کہ نئے گیس کنیکشنز کے لیے لاکھوں درخواستیں موصول ہو چکی ہیں، اور اب ان درخواستوں پر عملدرآمد شروع کیا جا رہا ہے۔ اُن کے مطابق، اس اقدام سے عوام کا ایک اہم مطالبہ پورا ہو گیا ہے۔
گیس چوری کیخلاف سوئی سدرن کی کارروائیاں؛ 550 غیر قانونی کنکشنز منقطع
شہباز شریف نے یاد دلایا کہ 2013 میں لوڈشیڈنگ کا دورانیہ 20 گھنٹے سے زائد تھا، مگر مسلم لیگ (ن) کی حکومت نے شبانہ روز محنت سے ملک کو اندھیروں سے نکالا۔ اُن کا کہنا تھا کہ آج بھی حکومت پوری محنت اور عزم کے ساتھ ملک کو ترقی کی راہ پر گامزن کرنے کے لیے پرعزم ہے۔
