حکومت کی جانب سے پیٹرولیم مصنوعات کی قیمتوں میں آئندہ 15 روز کے لیے اضافے کا امکان ظاہر کیا جا رہا ہے، جس کا اطلاق یکم نومبر 2025 سے ہوگا۔
ذرائع کے مطابق اوگرا (تیل و گیس ریگولیٹری اتھارٹی) نے قیمتوں میں ردوبدل کی سمری تیار کر لی ہے جو 31 اکتوبر کو وزارتِ خزانہ کو بھجوائی جائے گی۔ وزارت خزانہ حتمی منظوری کے بعد نئی قیمتوں کا اعلان کرے گی۔
ابتدائی اندازوں کے مطابق پیٹرول کی قیمت میں 2 روپے 35 پیسے فی لیٹر اور ہائی اسپیڈ ڈیزل میں 2 روپے 50 پیسے فی لیٹر اضافہ متوقع ہے۔ منظوری کی صورت میں نئی قیمتیں یکم نومبر سے نافذ ہوں گی۔
اقتصادی ماہرین کے مطابق عالمی منڈی میں خام تیل کی قیمتوں میں معمولی اضافہ اور درآمدی اخراجات میں اضافے کے باعث قیمتوں پر دباؤ بڑھ گیا ہے۔
ملک بھر میں پیٹرولیم مصنوعات کی قلت کا خدشہ
ذرائع کا کہنا ہے کہ ٹیکسوں میں اضافہ اور روپے کی قدر میں کمی بھی پیٹرولیم مصنوعات کی قیمتوں کے بڑھنے کی بڑی وجوہات میں شامل ہیں۔
ماہرین نے عندیہ دیا ہے کہ اگر عالمی منڈی میں خام تیل کی قیمتیں مستحکم رہیں تو آئندہ پندرہ روزہ جائزے میں اضافہ محدود رکھا جا سکتا ہے، تاہم اگر ڈالر مزید مہنگا ہوا یا تیل کے نرخ بڑھے تو مزید اضافہ بھی متوقع ہے۔
