اسلام آباد: پاکستان میں یکم دسمبر 2025 سے پیٹرولیم مصنوعات کی قیمتوں میں نمایاں کمی کا امکان ظاہر کیا جا رہا ہے، جو اگلے پندرہ روز کے لیے عوام کو ریلیف فراہم کر سکتی ہے۔
صنعتی اور سرکاری ذرائع کے مطابق یکم دسمبر سے پیٹرولیم مصنوعات میں فی لیٹر 6.35 روپے تک کمی متوقع ہے۔ حکام کے مطابق عالمی سپلائی میں بہتری کے باعث قیمتوں میں کمی کا امکان پیدا ہوا ہے، خصوصاً کویت کی الزور ریفائنری کی متعدد یونٹس کی بحالی کے بعد دنیا بھر میں ریفائنڈ مصنوعات کی دستیابی بڑھ گئی ہے۔
13 روز کے ڈیٹا پر مبنی ابتدائی حسابات کے مطابق پیٹرول کی قیمت میں 3.70 روپے فی لیٹر کمی متوقع ہے، جس کے بعد موجودہ قیمت 265.45 روپے سے کم ہو کر تقریباً 261.75 روپے فی لیٹر رہ سکتی ہے۔
اسی طرح ہائی اسپیڈ ڈیزل کی قیمت میں بھی واضح کمی کا امکان ظاہر کیا جا رہا ہے۔ ذرائع کے مطابق ڈیزل کی قیمت میں 4.28 روپے فی لیٹر کمی کے بعد یہ 284.44 روپے سے کم ہو کر تقریباً 280.16 روپے فی لیٹر پر آ سکتی ہے۔
مٹی کے تیل (کیروسین) کی قیمت میں معمولی کمی متوقع ہے۔ تخمینے کے مطابق 0.73 روپے کمی کے بعد کیروسین کی نئی قیمت 194.34 روپے سے کم ہو کر 193.61 روپے فی لیٹر ہو سکتی ہے۔
ذرائع کا کہنا ہے کہ لائٹ ڈیزل آئل کی قیمت میں سب سے زیادہ کمی کا امکان ہے۔ 6.35 روپے فی لیٹر کمی کے بعد اس کی قیمت 170.80 روپے سے کم ہو کر تقریباً 164.45 روپے فی لیٹر ہونے کی توقع ہے۔
