وزارتِ خزانہ کے مطابق پاکستان کے واجب الادا بیرونی قرضے زیادہ تر امریکی ڈالر، SDRs، چینی یوان، جاپانی ین اور یورو میں ہیں، حکومت بین الاقوامی بانڈز کے ذریعے مارکیٹ تک رسائی بڑھانے کی منصوبہ بندی کر رہی ہے۔
اسلام آباد، پاکستان کے کل بیرونی قرضے تقریباً 130 ارب ڈالر ہیں اور وزارتِ خزانہ کی جاری کردہ ڈیٹ مینجمنٹ اسٹریٹیجی برائے 2026 تا 2028 کے مطابق زیادہ تر واجب الادا بیرونی قرضے پانچ بڑی کرنسیوں میں مرکوز ہیں۔
امریکی ڈالر اس پورٹ فولیو میں 57.8 فیصد کے ساتھ سب سے آگے ہے، جبکہ اسپیشل ڈرائنگ رائٹس (SDRs) کا حصہ 29.88 فیصد، چینی یوان 5.21 فیصد، جاپانی ین 3.95 فیصد اور یورو 2.62 فیصد ہے۔
رپورٹ میں کہا گیا ہے کہ بیرونی فنانسنگ کا انحصار مستقبل میں بھی کثیرالجہتی اور دوطرفہ ذرائع پر ہوگا جو رعایتی شرائط اور طویل المدتی ادائیگی کی سہولت فراہم کرتے ہیں۔
حکومت بین الاقوامی کیپٹل مارکیٹس میں دوبارہ داخلے کے لیے پانڈا بانڈز، سسٹین ایبل بانڈز اور یورو بانڈز کے اجرا کا منصوبہ رکھتی ہے تاکہ مارکیٹ تک رسائی وسیع ہو اور زیادہ لچکدار شرائط پر فنانسنگ میسر آئے، بشرطیکہ عالمی شرحِ سود اور مجموعی معاشی استحکام سازگار رہیں۔
