رواں مالی سال 2025-26 کے پہلے چار ماہ کے دوران پاکستان کی ٹیکسٹائل برآمدات تاریخ کی بلند ترین سطح پر پہنچ گئیں اور 6.4 ارب ڈالر ریکارڈ کی گئیں۔
عارف حبیب لمیٹڈ کی رپورٹ کے مطابق نِٹ ویئر کی برآمدات 1.9 ارب ڈالر جبکہ ریڈی میڈ گارمنٹس کی برآمدات 1.4 ارب ڈالر تک پہنچیں، جو دونوں شعبوں کے لیے پہلے چار ماہ کی ریکارڈ سطح ہے۔ رپورٹ میں بتایا گیا ہے کہ ویلیو ایڈڈ شعبوں نے اس کارکردگی میں نمایاں حصہ ڈالا ہے۔
ٹیکسٹائل برآمدات میں یہ اضافہ عالمی مانگ میں بہتری، ویلیو ایڈڈ مصنوعات کی مضبوط کارکردگی اور روپے کی قدر میں استحکام کا نتیجہ ہے۔
حکومت کی طرف سے کاروبار دوست پالیسیاں، برآمدات کے فروغ کے لیے ترجیحات اور صنعتی سہولت کاری نے بھی اس کامیابی میں اہم کردار ادا کیا۔ توانائی کی لاگت میں استحکام، کاروباری اعتماد کی بحالی اور برآمدی شعبے کے لیے سہولتی اقدامات نے مجموعی تجارتی ماحول کو مزید مضبوط بنایا ہے۔
یہ پیش رفت پاکستان کی ٹیکسٹائل انڈسٹری کی مسابقتی حیثیت کو بڑھانے اور برآمدات کے فروغ کے لیے حکومتی وژن کا عملی ثبوت ہے۔
